ಚೆನ್ನೈ ಮೇ. 02 : ಐಪಿಎಲ್ ಇತಿಹಾಸದ ಅತ್ಯಂತ ಯಶಸ್ವಿ ತಂಡಗಳಾದ ಚೆನ್ನೈ ಸೂಪರ್ ಕಿಂಗ್ಸ್ (CSK) ಮತ್ತು ಮುಂಬೈ ಇಂಡಿಯನ್ಸ್ (MI) ಇಂದು ಎಂ.ಎ. ಚಿದಂಬರಂ ಕ್ರೀಡಾಂಗಣದಲ್ಲಿ ಮುಖಾಮುಖಿಯಾಗುತ್ತಿವೆ. ಆದರೆ, ಈ ಬಾರಿ ಈ ತೀವ್ರ ಪೈಪೋಟಿಯ ಪಂದ್ಯವು ಕೇವಲ ಪ್ರತಿಷ್ಠೆಯ ಸಂಕೇತವಾಗಿ ಉಳಿಯದೆ, ಎರಡೂ ತಂಡಗಳ ಅಸ್ತಿತ್ವದ ಹೋರಾಟವಾಗಿ ಮಾರ್ಪಟ್ಟಿದೆ.
ಸಂಕಷ್ಟದಲ್ಲಿ ಮಾಜಿ ಚಾಂಪಿಯನ್ನರು
ತಲಾ ಐದು ಬಾರಿ ಟ್ರೋಫಿ ಗೆದ್ದಿರುವ ಈ ತಂಡಗಳು ಪ್ರಸ್ತುತ ಈ ಸೀಸನ್ನಲ್ಲಿ ಹೀನಾಯ ಪ್ರದರ್ಶನ ನೀಡುತ್ತಿವೆ. ಮುಂಬೈ ಇಂಡಿಯನ್ಸ್ ಆಡಿದ ಎಂಟು ಪಂದ್ಯಗಳಲ್ಲಿ ಆರರಲ್ಲಿ ಸೋತು ಕಂಗೆಟ್ಟಿದ್ದರೆ, ಚೆನ್ನೈ ಎಂಟು ಪಂದ್ಯಗಳಲ್ಲಿ ಐದು ಸೋಲು ಕಂಡು ಅಂಕಪಟ್ಟಿಯ ತಳಭಾಗದಲ್ಲಿವೆ. ಇಂದಿನ ಪಂದ್ಯದಲ್ಲಿ ಸೋಲುವ ತಂಡಕ್ಕೆ ಪ್ಲೇ-ಆಫ್ ಬಾಗಿಲು ಬಹುತೇಕ ಮುಚ್ಚಲಿದೆ.
ಮುಂಬೈ ತಂಡದ ಪಾಲಿಗೆ ಸ್ಟಾರ್ ಆಟಗಾರರ ಫಾರ್ಮ್ ದೊಡ್ಡ ತಲೆನೋವಾಗಿದೆ. ರೋಹಿತ್ ಶರ್ಮಾ ಗಾಯದ ಸಮಸ್ಯೆಯಿಂದ ಬಳಲುತ್ತಿದ್ದರೆ, ಹಾರ್ದಿಕ್ ಪಾಂಡ್ಯ ಮತ್ತು ಸೂರ್ಯಕುಮಾರ್ ಯಾದವ್ ಸ್ಥಿರ ಪ್ರದರ್ಶನ ನೀಡಲು ವಿಫಲರಾಗಿದ್ದಾರೆ. ಬೌಲಿಂಗ್ನಲ್ಲಿ ಬುಮ್ರಾ ಏಕಾಂಗಿ ಹೋರಾಟ ನಡೆಸುತ್ತಿದ್ದಾರೆ. ಕಳೆದ ಪಂದ್ಯದಲ್ಲಿ ಹೈದರಾಬಾದ್ ವಿರುದ್ಧ 243 ರನ್ ಗಳಿಸಿದರೂ ಬೌಲರ್ಗಳು ಅದನ್ನು ರಕ್ಷಿಸಿಕೊಳ್ಳಲಾಗದಿದ್ದುದು ತಂಡದ ಸಮನ್ವಯದ ಕೊರತೆಯನ್ನು ಎತ್ತಿ ತೋರಿಸುತ್ತಿದೆ.
ಇತ್ತ ಚೆನ್ನೈ ತಂಡದ ಬ್ಯಾಟಿಂಗ್ ವಿಭಾಗವು ಸಂಪೂರ್ಣವಾಗಿ ಕುಸಿದಿದೆ. ಟಾಪ್ 10 ರನ್ ಸರದಾರರ ಪಟ್ಟಿಯಲ್ಲಿ ಸಿಎಸ್ಕೆಯ ಒಬ್ಬನೇ ಒಬ್ಬ ಆಟಗಾರ ಇಲ್ಲದಿರುವುದು ತಂಡದ ಬ್ಯಾಟಿಂಗ್ ದುಸ್ಥಿತಿಗೆ ಕೈಗನ್ನಡಿಯಾಗಿದೆ. ಸಂಜು ಸ್ಯಾಮ್ಸನ್ ಹೋರಾಟ ನಡೆಸುತ್ತಿದ್ದರೂ, ಪ್ರತಿಭಾವಂತ ಆಟಗಾರ ಆಯುಷ್ ಮ್ಹಾತ್ರೆ ಗಾಯಗೊಂಡು ಟೂರ್ನಿಯಿಂದ ಹೊರಬಿದ್ದಿರುವುದು ತಂಡಕ್ಕೆ ದೊಡ್ಡ ಹೊಡೆತ ನೀಡಿದೆ.
ಪ್ಲೇ-ಆಫ್ ಲೆಕ್ಕಾಚಾರ : ಅಸಾಧ್ಯವಲ್ಲ, ಆದರೆ ಕಠಿಣ
ಪ್ರಸ್ತುತ ಪಂಜಾಬ್ ಕಿಂಗ್ಸ್ (13 ಅಂಕ), ಆರ್ಸಿಬಿ, ಎಸ್ಆರ್ಎಚ್ ಮತ್ತು ರಾಜಸ್ಥಾನ್ (ತಲಾ 12 ಅಂಕ) ಮೊದಲ ನಾಲ್ಕು ಸ್ಥಾನಗಳಲ್ಲಿವೆ. ಮುಂಬೈಗೆ ಗರಿಷ್ಠ 16 ಮತ್ತು ಚೆನ್ನೈಗೆ 18 ಅಂಕ ಗಳಿಸುವ ಅವಕಾಶವಿದೆ.
ಮುಂಬೈ: ಇನ್ನುಳಿದ ಆರು ಪಂದ್ಯಗಳಲ್ಲಿ ಕನಿಷ್ಠ ಐದನ್ನು ಗೆಲ್ಲಲೇಬೇಕು.
ಚೆನ್ನೈ: ಉಳಿದ ಆರು ಪಂದ್ಯಗಳಲ್ಲಿ ಕನಿಷ್ಠ ನಾಲ್ಕರಲ್ಲಿ ಜಯ ದಾಖಲಿಸಬೇಕು.
ತಮ್ಮ ಗೆಲುವಿನ ಜೊತೆಗೆ ಅಗ್ರಸ್ಥಾನದಲ್ಲಿರುವ ತಂಡಗಳು ಸತತವಾಗಿ ಸೋಲಲಿ ಎಂದು ಪ್ರಾರ್ಥಿಸಬೇಕಾದ ಅನಿವಾರ್ಯತೆ ಈ ದಿಗ್ಗಜ ತಂಡಗಳಿಗೆ ಎದುರಾಗಿದೆ. ಇಂದಿನ ಪಂದ್ಯವು ಈ ಐಪಿಎಲ್ನ ಅತ್ಯಂತ ರೋಚಕ ತಿರುವುಗಳನ್ನು ಕಾಣಲಿವೆ.
