ಬೆಂಗಳೂರು: ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಡೊನಾಲ್ಡ್ ಟ್ರಂಪ್ ಭರ್ಜರಿ ಜಯ ಸಾಧಿಸಿದ ಬೆನ್ನಲ್ಲೇ ಭಾರತದಲ್ಲಿ ರಿಯಲ್ ಎಸ್ಟೇಟ್ ಕ್ಷೇತ್ರ ಚಿಗುರಿಕೊಳ್ಳತೊಡಗಿದೆ. ಡೊನಾಲ್ಡ್ ಅವರ ಟ್ರಂಪ್ ಆರ್ಗೈನೈಜೇಷನ್ ಕಂಪನಿಯಿಂದ ನಡೆಯುವ ರಿಯಲ್ ಎಸ್ಟೇಟ್ ಉದ್ಯಮ ಟ್ರಂಪ್ ಟವರ್ ಭಾರತಕ್ಕೆ ನೇರ ಪ್ರವೇಶ ಮಾಡಲಿದೆ ಎಂದು ಬಲ್ಲ ಮೂಲಗಳು ತಿಳಿಸಿವೆ.
ಬೆಂಗಳೂರು ಸೇರಿದಂತೆ ಭಾರತದ ಆರು ಪ್ರಮುಖ ನಗರಗಳಲ್ಲಿ ಶೀಘ್ರ ಟ್ರಂಪ್ ಟವರ್‌ಗಳು ತಲೆ ಎತ್ತಲಿವೆ ಎಂದು ಅಮೆರಿಕದ ಮಾಧ್ಯಮಗಳು ವರದಿ ಮಾಡಿವೆ. ಟ್ರಂಪ್ ಆರ್ಗನೈಸೇಷನ್ ಕಂಪನಿಯಿಂದ ಸ್ಥಾಪನೆಯಾಗುವ ರಿಯಲ್ ಎಸ್ಟೇಟ್ ಕೇಂದ್ರಗಳೇ ಟ್ರಂಪ್ ಟವರ್‌ಗಳು. ದೇಶದ ಮುಂಬೈ, ಪುಣೆ, ದೆಹಲಿ ಹಾಗೂ ಕೋಲ್ಕತ್ತದಲ್ಲಿ ಈಗಾಗಲೇ ಟ್ರಂಪ್ ಕೇಂದ್ರಗಳಿವೆ. ಬೆಂಗಳೂರು, ಹೈದರಾಬಾದ್, ನೋಯ್ಡಾ, ಪುಣೆ, ಮುಂಬೈ, ಗುರುಗ್ರಾಮದಲ್ಲಿ ಹೊಸ ಟ್ರಂಪ್ ಟವರ್‌ಗಳು ತಲೆ ಎತ್ತಲಿವೆ ಎಂದು ಭಾರತದ ರಿಯಲ್ ಎಸ್ಟೇಟ್ ಕಂಪನಿಯೊಂದು ತಿಳಿಸಿದೆ.
ಟ್ರಿಬೆಕಾ ಎಂಬ ರಿಯಲ್ ಎಸ್ಟೇಟ್ ಕಂಪನಿ ಭಾರತದಲ್ಲಿ ಮೂರು ಕಡೆ ಟ್ರಂಪ್ ಟವರ್‌ಗಳನ್ನು ನಿರ್ಮಾಣ ಮಾಡಿದೆ. ಆದರೆ, ಈ ಯೋಜನೆಗಳಲ್ಲಿ ಟ್ರಂಪ್ ಆರ್ಗೈನೈಜೇಷನ್ ನೇರವಾಗಿ ಭಾಗಿಯಾಗಿರಲಿಲ್ಲ ಮತ್ತು ಹಣ ಹೂಡಿಕೆ ಮಾಡಿರಲಿಲ್ಲ. ಆದರೆ, ಟ್ರಂಪ್ ಟವರ್ ಹೆಸರಿನಲ್ಲಿ ಯೋಜನೆಗಳಿಗೆ ಬೆಂಬಲ ಹಾಗೂ ತಾಂತ್ರಿಕ ಸಹಕಾರ ನೀಡಿತ್ತು ಎಂದು ತಿಳಿದು ಬಂದಿದೆ.
ಟ್ರಿಬೆಕಾ ಕಂಪನಿಯು ಟ್ರಂಪ್ ಆರ್ಗನೈಸೇಷನ್ ಸಹಭಾಗಿತ್ವದಲ್ಲಿ ಭಾರತದಲ್ಲಿ ಸುಮಾರು 80 ಲಕ್ಷ ಚದರ ಅಡಿಯ ಆರು ಯೋಜನೆಗಳನ್ನು ಅಂತಿಮಗೊಳಿಸಿದೆ. ಡಿಸೆಂಬರ್‌ನಲ್ಲಿ ಇದು ಅಂತಿಮ ಹಂತಕ್ಕೆ ಬರಲಿದೆ. ಮುಂದಿನ ವರ್ಷ ಜೂನ್ ಅಥವಾ ಜುಲೈ ಸಮಯದಲ್ಲಿ ಭಾರತಕ್ಕೆ ಬರಲಿರುವ ಟ್ರಂಪ್ ಕಂಪನಿಯ ಮುಖ್ಯಸ್ಥರು ಈ ಯೋಜನೆಗಳಿಗೆ ಚಾಲನೆ ನೀಡಲಿದ್ದಾರೆ ಎಂದು ಟ್ರಿಬೆಕಾ ಕಂಪನಿ ತಿಳಿಸಿದೆ.
