ಜೆರುಸಲೆಂ / ತೆಹ್ರಾನ್ / ಮಸ್ಕಟ್, ಮಾರ್ಚ್ 24: ಅಮೆರಿಕಾ-ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧ ಇಂದು ೨೫ನೇ ದಿನ ತಲುಪಿದೆ. ಒಂದೆಡೆ ರಾಜತಾಂತ್ರಿಕರು ಶಾಂತಿ ಸಂಧಾನದ ಸಾಧ್ಯತೆಗಳನ್ನು ಚರ್ಚಿಸುತ್ತಿದ್ದರೆ, ಇನ್ನೊಂದೆಡೆ ಅಮೆರಿಕ ಸೇನಾಧಿಕಾರಿಗಳು, ಇರಾನ್ನ ರೆವಲ್ಯೂಷನರಿ ಗಾರ್ಡ್ (IRGC) ತೀವ್ರ ಯುದ್ಧೋನ್ಮಾದದಿಂದ ಪ್ರತಿಕ್ರಿಯಿಸುತ್ತಿವೆ.
ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ “ಇರಾನ್ನೊಂದಿಗೆ ಉತ್ತಮ ಮತ್ತು ಫಲಪ್ರದ ಮಾತುಕತೆ” ನಡೆಯುತ್ತಿದೆ ಎಂದು ಹೇಳಿ, ಇರಾನ್ನ ವಿದ್ಯುತ್ ಸ್ಥಾವರಗಳ ಮೇಲಿನ ದಾಳಿ ಬೆದರಿಕೆಯನ್ನು ಐದು ದಿನಗಳ ಕಾಲ ಮುಂದೂಡಿರುವುದಾಗಿ ಘೋಷಿಸಿದ್ದಾರೆ. ಆದರೆ ಇರಾನ್ ಸರ್ಕಾರವು ಇದನ್ನು “ಸುಳ್ಳು ಸುದ್ದಿ” ಎಂದು ತಿರಸ್ಕರಿಸಿದೆ.
ರಾಜತಾಂತ್ರಿಕ ಪ್ರಯತ್ನಗಳು
ಇರಾನ್ ವಿದೇಶಾಂಗ ಸಚಿವ ಸಯ್ಯದ್ ಅಬ್ಬಾಸ್ ಅರಾಗ್ಚಿ ಅವರು ಒಮಾನ್ಗೆ ತೆರಳಿ, ಒಮಾನ್ ವಿದೇಶಾಂಗ ಸಚಿವ ಸಯ್ಯದ್ ಬದ್ರ್ ಅಲ್ ಬುಸೈದಿ ಅವರೊಂದಿಗೆ ವಿವರವಾದ ಚರ್ಚೆ ನಡೆಸಿದ್ದಾರೆ.
ಒಮಾನ್ ದೇಶವು ಯುದ್ಧಆರಂಭಕ್ಕೂ ಹಿಂದೆಯೇ ಅಮೆರಿಕಾ-ಇರಾನ್ ನಡುವಿನ ಪರೋಕ್ಷ ಮಾತುಕತೆಗಳಿಗೆ ಮುಖ್ಯ ಮಧ್ಯಸ್ಥಿಕೆಯಾಗಿ ಕಾರ್ಯನಿರ್ವಹಿಸುತ್ತಿದೆ. ಈಗಲೂ “ತಕ್ಷಣ ಸೀಸ್ಫೈರ್ ಮತ್ತು ಡಿಪ್ಲೊಮಸಿ ಮಾರ್ಗ”ವನ್ನು ಒತ್ತಾಯಿಸುತ್ತಿದೆ. ಇರಾನ್ ಸಚಿವರ ಈ ಭೇಟಿ ರಾಜತಾಂತ್ರಿಕ ಪ್ರಯತ್ನಗಳು ಇನ್ನೂ ಜೀವಂತವಾಗಿವೆ ಎಂಬ ಸಂದೇಶ ನೀಡುತ್ತಿದೆ.
ಮಿಲಿಟರಿ ಅಧಿಕಾರಿಗಳ ತೀವ್ರ ಪ್ರತಿಕ್ರಿಯೆ
ಇದೇ ಸಮಯದಲ್ಲಿ ಇರಾನ್ನ ರೆವಲ್ಯೂಷನರಿ ಗಾರ್ಡ್ (IRGC) ಅಮೆರಿಕ ಹೇಳಿಕೆಗಳನ್ನು ತಿರಸ್ಕರಿಸಿದೆ. ಟ್ರಂಪ್ ಅವರ ಹೇಳಿಕೆಗಳನ್ನು “ಅಮೆರಿಕಾದ ದೌರ್ಬಲ್ಯ” ಎಂದು ವಿವರಿಸಿದ IRGC, “ಇರಾನ್ನ ಇಂಧನ ಅಥವಾ ಶಕ್ತಿ ಸೌಲಭ್ಯಗಳ ಮೇಲೆ ದಾಳಿ ನಡೆದರೆ, ಪ್ರದೇಶದಲ್ಲಿ ಅಮೆರಿಕಾ-ಇಸ್ರೇಲ್ಗೆ ಸಂಬಂಧಿಸಿದ ಎಲ್ಲ ಇಂಧನ, ಸಂವಹನ ಮತ್ತು ನೀರಿನ ಸೌಲಭ್ಯಗಳನ್ನು ಗುರಿಯಾಗಿಸುತ್ತೇವೆ” ಎಂದು ಮತ್ತೆ ಎಚ್ಚರಿಸಿದೆ.
IRGC “ಯುದ್ಧವನ್ನು ನಾವೇ ನಿರ್ಧರಿಸುತ್ತೇವೆ” ಎಂದು ಹೇಳುತ್ತಿದ್ದು, ಮಿಲಿಟರಿ ವರ್ಗದಲ್ಲಿ ಯುದ್ಧೋನ್ಮಾದ ತೀವ್ರವಾಗಿದೆ ಎಂಬುದು ಸ್ಪಷ್ಟವಾಗುತ್ತಿದೆ.
ಯುದ್ಧದ ಇತ್ತೀಚಿನ ದಾಳಿಗಳಲ್ಲಿ ಇರಾನ್ ಕ್ಷಿಪಣಿಗಳು ತೆಲ್ ಅವೀವ್ ನಗರದ ಮಧ್ಯಭಾಗಕ್ಕೆ ಬಿದ್ದು ಕಟ್ಟಡಗಳಿಗೆ ದೊಡ್ಡ ಹಾನಿ ಉಂಟಾಗಿದೆ. ಕನಿಷ್ಠ ನಾಲ್ಕು ಜನರು ಗಾಯಗೊಂಡಿದ್ದಾರೆ. ಉತ್ತರ ಇಸ್ರೇಲ್ ಮತ್ತು ಲೆಬನಾನ್ನಲ್ಲಿ ದಾಳಿಗಳು ಮುಂದುವರಿದಿವೆ.
ಇಸ್ರೇಲ್ನಲ್ಲಿ ಯುದ್ಧ ಆರಂಭದಿಂದ ಸುಮಾರು ೪,೮೦೦ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ಇರಾನ್ನಲ್ಲಿ ಇದುವರೆಗೆ ಸುಮಾರು ೧,೫೦೦ಕ್ಕೂ ಹೆಚ್ಚು ಸಾವುಗಳು ವರದಿಯಾಗಿವೆ. ಇರಾನ್ನಲ್ಲಿ ಇಂಟರ್ನೆಟ್ ಬ್ಲ್ಯಾಕ್ಔಟ್ ೨೫ನೇ ದಿನಕ್ಕೆ ಕಾಲಿಟ್ಟಿದೆ.
ಪಾಕಿಸ್ತಾನ, ಈಜಿಪ್ಟ್ ಮತ್ತು ಟರ್ಕಿಯೆ ಸೇರಿದಂತೆ ಕೆಲವು ದೇಶಗಳು ಮಧ್ಯಸ್ಥಿಕೆ ವಹಿಸಲು ಸಿದ್ಧತೆ ವ್ಯಕ್ತಪಡಿಸಿವೆ. ಆದರೆ ರಾಜತಾಂತ್ರಿಕ ಪ್ರಯತ್ನಗಳು ಮುಂದುವರಿದರೂ, ಮಿಲಿಟರಿ ದಾಳಿಗಳು ತೀವ್ರಗೊಂಡಿರುವುದು ಪರಿಸ್ಥಿತಿಯನ್ನು ಸಂಕೀರ್ಣಗೊಳಿಸುತ್ತಿದೆ.
