Belonging: A Journey of Love ಬರಹ ಸರಣಿ-1
ಸ್ವಾತಂತ್ರ್ಯದ ಬಳಿಕ ಕಾಂಗ್ರೆಸ್ಗೆ ಅಧಿಕಾರ ಸಿಕ್ಕಾಗ, ಅದನ್ನು ತನ್ನ ಶಾಶ್ವತ ಸ್ವತ್ತೆಂದು ಭಾವಿಸಿ ಸರ್ವಾಧಿಕಾರ ಸ್ಥಾಪಿಸಬಹುದಿತ್ತು. ಆದರೆ ಕಾಂಗ್ರೆಸ್ ಹಾಗೆ ಮಾಡಲಿಲ್ಲ. ಪ್ರಜಾಪ್ರಭುತ್ವ ವ್ಯವಸ್ಥೆಗೆ ಬುನಾದಿ ಹಾಕಿ, ಅಧಿಕಾರದ ಅಂತಿಮ ನಿರ್ಧಾರವನ್ನು ಜನರ ಕೈಗೆ ಒಪ್ಪಿಸಿತು. ಅದಕ್ಕಾಗಿಯೇ ಇಂದು ನರೇಂದ್ರ ಮೋದಿ ಪ್ರಧಾನಿಯಾಗಿ ದೇಶವನ್ನು ಆಳಲು ಸಾಧ್ಯವಾಗಿದೆ – ಕೆ.ಚಂದ್ರಶೇಖರ ಶೆಟ್ಟಿ, ರಾಜಕೀಯ ವಿಶ್ಲೇಷಕರು.
ಬಿಜೆಪಿ ಸಂಸದ ಹಾಗೂ ಭೋಜ್ಪುರಿ ಚಿತ್ರನಟ ರವಿ ಕಿಶನ್ ಅವರು ಸೋನಿಯಾ ಗಾಂಧಿಯವರ ಆತ್ಮಕಥನದ ಹಿನ್ನೆಲೆಯಲ್ಲಿ ಒಂದು ವ್ಯಂಗ್ಯಾತ್ಮಕ ಸಲಹೆ ನೀಡಿದ್ದಾರೆ. “ಒಬ್ಬ ಚಹಾ ಮಾರಾಟಗಾರ ನರೇಂದ್ರ ಮೋದಿ ಅವರು ಗಾಂಧಿ ಕುಟುಂಬದ ರಾಜಕೀಯ ಸಾಮ್ರಾಜ್ಯವನ್ನು ಹೇಗೆ ನೆಲಸಮ ಮಾಡಿದರು ಎಂಬುದರ ಬಗ್ಗೆ ಸೋನಿಯಾ ಗಾಂಧಿ ಒಂದು ಪುಸ್ತಕ ಬರೆಯಬೇಕು” ಎಂಬುದು ಅವರ ಸಲಹೆಯ ಸಾರ.
ನಿಜಕ್ಕೂ, ಸೋನಿಯಾ ಗಾಂಧಿಯವರು ನರೇಂದ್ರ ಮೋದಿ ಕುರಿತು ಒಂದು ಪುಸ್ತಕ ಬರೆಯಬೇಕೆಂದರೆ, ಅದರ ಪೀಠಿಕೆಯಲ್ಲಿ ದಾಖಲಿಸಬೇಕಾದ ಒಂದು ಮಹತ್ವದ ವಿಚಾರವಿದೆ. ಅದನ್ನು ಅರ್ಥಮಾಡಿಕೊಂಡರೆ ಭಾರತದ ಪ್ರಜಾಪ್ರಭುತ್ವದ ಇತಿಹಾಸದಲ್ಲಿ ಕಾಂಗ್ರೆಸ್ನ ಪಾತ್ರವೇನು ಎಂಬುದು ಸ್ಪಷ್ಟವಾಗುತ್ತದೆ.
ಸ್ವಾತಂತ್ರ್ಯದ ಬಳಿಕ ಕಾಂಗ್ರೆಸ್ಗೆ ಅಧಿಕಾರ ಸಿಕ್ಕಾಗ, ಅದನ್ನು ತನ್ನ ಶಾಶ್ವತ ಸ್ವತ್ತೆಂದು ಭಾವಿಸಿ ಸರ್ವಾಧಿಕಾರ ಸ್ಥಾಪಿಸಬಹುದಿತ್ತು. ಆದರೆ ಕಾಂಗ್ರೆಸ್ ಹಾಗೆ ಮಾಡಲಿಲ್ಲ. ಪ್ರಜಾಪ್ರಭುತ್ವ ವ್ಯವಸ್ಥೆಗೆ ಬುನಾದಿ ಹಾಕಿ, ಅಧಿಕಾರದ ಅಂತಿಮ ನಿರ್ಧಾರವನ್ನು ಜನರ ಕೈಗೆ ಒಪ್ಪಿಸಿತು. ಅದಕ್ಕಾಗಿಯೇ ಇಂದು ನರೇಂದ್ರ ಮೋದಿ ಪ್ರಧಾನಿಯಾಗಿ ದೇಶವನ್ನು ಆಳಲು ಸಾಧ್ಯವಾಗಿದೆ.
ಒಂದು ಕ್ಷಣ ಯೋಚಿಸಿ. ಇದೇ ಅಧಿಕಾರ ಮನುವಾದಿಗಳ ಕೈಗೆ ಸಿಕ್ಕಿದ್ದರೆ, ಭಾರತದಲ್ಲಿ ಪ್ರಜಾಪ್ರಭುತ್ವ ಜಾರಿಯಾಗುತ್ತಿತ್ತೇ? ಡಾ. ಬಿ.ಆರ್. ಅಂಬೇಡ್ಕರ್ ಅವರು ರಚಿಸಿದ ಸಂವಿಧಾನದ ಹೆಸರನ್ನಾದರೂ ಕೇಳಲು ಸಿಗುತ್ತಿತ್ತೇ? ಬಹುಶಃ ಸಂವಿಧಾನ ಮತ್ತು ಸಮಾನತೆಯ ಮೌಲ್ಯಗಳ ಬದಲಿಗೆ ಸರ್ವಾಧಿಕಾರಿ ಮನುವಾದಿ ವ್ಯವಸ್ಥೆಯೇ ಆಡಳಿತ ನಡೆಸುತ್ತಿತ್ತು. ಭಾರತದ ಸ್ಥಿತಿ ಇಂದು ಪಾಕಿಸ್ತಾನ, ಬಾಂಗ್ಲಾದೇಶ, ಉಗಾಂಡಗಳಿಗಿಂತಲೂ ಕಳಪೆಯಾಗಿರುತ್ತಿತ್ತು.

ಇಲ್ಲಿ ಒಂದು ಐತಿಹಾಸಿಕ ವ್ಯಂಗ್ಯವಿದೆ. ಕಾಂಗ್ರೆಸ್ ನಿರ್ಮಿಸಿದ ಪ್ರಜಾಪ್ರಭುತ್ವ ವ್ಯವಸ್ಥೆಯ ಫಲಾನುಭವಿಯಾಗಿ ನರೇಂದ್ರ ಮೋದಿ ಅಧಿಕಾರಕ್ಕೆ ಬಂದಿದ್ದಾರೆ. ಅದೇ ಪ್ರಜಾಪ್ರಭುತ್ವ ವ್ಯವಸ್ಥೆಯು ಅವರಿಗೆ ಅಧಿಕಾರವನ್ನು ನೀಡಿದಂತೆ, ಮುಂದೊಂದು ದಿನ ಅಧಿಕಾರದಿಂದ ಕೆಳಗಿಳಿಸುವ ಹಕ್ಕನ್ನೂ ಜನರಿಗೆ ನೀಡಿದೆ. ಇದೇ ಪ್ರಜಾಪ್ರಭುತ್ವದ ನಿಜವಾದ ಶಕ್ತಿ.
ಕಾಂಗ್ರೆಸ್ನ ಐತಿಹಾಸಿಕ ಕೊಡುಗೆಯನ್ನು ಅಳೆಯಬೇಕಾದರೆ, ಅದು ಎಷ್ಟು ವರ್ಷ ಅಧಿಕಾರದಲ್ಲಿತ್ತು ಎಂಬುದನ್ನು ಮಾತ್ರ ನೋಡಬಾರದು. ಅಧಿಕಾರದಲ್ಲಿದ್ದಾಗ ದೇಶಕ್ಕೆ ಯಾವ ಆಡಳಿತ ವ್ಯವಸ್ಥೆಯನ್ನು ರೂಪಿಸಿತು, ಜನರಿಗೆ ಯಾವ ಹಕ್ಕುಗಳನ್ನು ನೀಡಿತು ಮತ್ತು ಅಧಿಕಾರ ಬದಲಾವಣೆಯ ಅವಕಾಶವನ್ನು ಹೇಗೆ ಉಳಿಸಿತು ಎಂಬುದನ್ನೂ ಗಮನಿಸಬೇಕು.
ಕಾಂಗ್ರೆಸ್ ಅಧಿಕಾರವನ್ನು ಶಾಶ್ವತಗೊಳಿಸಿಕೊಳ್ಳುವುದಕ್ಕಿಂತ ಪ್ರಜಾಪ್ರಭುತ್ವವನ್ನು ಉಳಿಸುವ ವ್ಯವಸ್ಥೆಯನ್ನು ನಿರ್ಮಿಸಿತು. ಅದಕ್ಕಾಗಿಯೇ ಇಂದು ಕಾಂಗ್ರೆಸ್ನ ರಾಜಕೀಯ ಎದುರಾಳಿಗಳೂ ಅದೇ ಪ್ರಜಾಪ್ರಭುತ್ವದ ಮೂಲಕ ಅಧಿಕಾರಕ್ಕೆ ಬರಲು ಸಾಧ್ಯವಾಗಿದೆ.
ಸೋನಿಯಾ ಗಾಂಧಿಯವರು ಮೋದಿ ಕುರಿತು ಬರೆಯುವ ಪುಸ್ತಕದ ಪೀಠಿಕೆಗೆ ಇದಕ್ಕಿಂತ ಸೂಕ್ತವಾದ ವಿಚಾರ ಇನ್ನೊಂದಿರಲಾರದು!
ಚಂದ್ರಶೇಖರ ಶೆಟ್ಟಿ
ಇವರು ಪ್ರಸಿದ್ಧ ವ್ಯಂಗ್ಯಚಿತ್ರಕಾರರು, ಪತ್ರಕರ್ತರು, ರಾಜಕೀಯ ವಿಶ್ಲೇಷಕರು ಮತ್ತು ಬರಹಗಾರರಾಗಿದ್ದಾರೆ
ಇದನ್ನೂ ಓದಿ- ರಾಜಕೀಯ ನೀಚತನಕ್ಕೆ ಅಭಿವ್ಯಕ್ತಿ ಸ್ವಾತಂತ್ರ್ಯದ ಮುಖವಾಡವೇ?


