ಪೆರಿಯಾರ್ ಅವರ ಇಸ್ಲಾಂ ಕುರಿತ ಚಿಂತನೆಯನ್ನು ‘ಧರ್ಮದ ಪರ ಅಥವಾ ವಿರೋಧ’ ಎಂಬ ಸರಳ ಚೌಕಟ್ಟಿನಲ್ಲಿ ನೋಡುವುದಕ್ಕಿಂತ, ಜಾತಿ ನಿರ್ಮೂಲನೆ, ಸ್ವಾಭಿಮಾನ, ಸಮಾನತೆ ಮತ್ತು ತರ್ಕಬದ್ಧ ಸಮಾಜ ನಿರ್ಮಾಣದ ಅವರ ವಿಶಾಲ ಚಿಂತನೆಯ ಭಾಗವಾಗಿ ಅರ್ಥೈಸುವುದು ಸೂಕ್ತ – ಖಾಸಿಂ ಸಾಬ್ ಎ, ಚಿಂತಕರು, ಬೆಂಗಳೂರು.
ತಮಿಳುನಾಡಿನ ಸಾಮಾಜಿಕ ಸುಧಾರಣಾ ಚಳವಳಿಯ ಇತಿಹಾಸವನ್ನು ಪ್ರಸ್ತಾಪಿಸುವಾಗ ಇ.ವಿ. ರಾಮಸ್ವಾಮಿ ‘ಪೆರಿಯಾರ್’ ಅವರ ಹೆಸರನ್ನು ಬದಿಗಿರಿಸಿ ನೋಡಲು ಸಾಧ್ಯವಿಲ್ಲ. ಜಾತಿ ವ್ಯವಸ್ಥೆ, ಅಸ್ಪೃಶ್ಯತೆ, ಸಾಮಾಜಿಕ ಅಸಮಾನತೆ ಮತ್ತು ಮೂಢನಂಬಿಕೆಗಳ ವಿರುದ್ಧ ತಮ್ಮ ಬದುಕನ್ನೇ ಹೋರಾಟವನ್ನಾಗಿ ರೂಪಿಸಿಕೊಂಡ ಪೆರಿಯಾರ್, ಇಸ್ಲಾಂ ಧರ್ಮದ ಕೆಲವು ಸಾಮಾಜಿಕ ತತ್ವಗಳನ್ನು ಭಾರತದ ಜಾತಿ ವಿರೋಧಿ ಚಳವಳಿಯ ದೃಷ್ಟಿಯಿಂದ ಗಮನಾರ್ಹವಾಗಿ ಪರಿಗಣಿಸಿದ್ದರು.
ಪೆರಿಯಾರರ ಇಸ್ಲಾಂ ಕುರಿತ ಆಸಕ್ತಿಯ ಕೇಂದ್ರಬಿಂದು ಧಾರ್ಮಿಕ ನಂಬಿಕೆಗಿಂತ ಸಾಮಾಜಿಕ ಸಮಾನತೆಯದ್ದಾಗಿತ್ತು. ಶ್ರೀಮಂತ–ಬಡವ, ಮೇಲ್ಜಾತಿ–ಕೆಳಜಾತಿ, ವರ್ಣ-ಬಣ್ಣ ಎಂಬ ಭೇದವಿಲ್ಲದೆ ಎಲ್ಲರೂ ಒಂದೇ ಸಾಲಿನಲ್ಲಿ ನಿಂತು ಪ್ರಾರ್ಥಿಸುವ ಇಸ್ಲಾಮಿನ ಆಚರಣೆ ಅವರಿಗೆ ಜಾತಿ ಆಧಾರಿತ ಸಾಮಾಜಿಕ ವ್ಯವಸ್ಥೆಗೆ ಒಂದು ಪರ್ಯಾಯದ ಸಂಕೇತವಾಗಿ ಕಂಡಿತು. ಇವರ ಸಾಂಸ್ಕೃತಿಕ ಆಂದೋಲನಕ್ಕೆ ಒಂದು ಪ್ರಮುಖ ಅಸ್ತ್ರವಾಗಿಯೂ ಕಂಡಿತು. ಮನುಷ್ಯನ ಗೌರವವು ಅವನ/ ಅವಳ ಜನ್ಮದಿಂದ ನಿರ್ಧಾರವಾಗಬಾರದು ಎಂಬ ವಿಚಾರವನ್ನು ಅವರು ತಮ್ಮ ಸ್ವಾಭಿಮಾನ ಚಳವಳಿಯ ಪ್ರಮುಖ ತತ್ವವನ್ನಾಗಿ ಮಾಡಿಕೊಂಡಿದ್ದರು.
ವಿಶೇಷವಾಗಿ ದಲಿತರು ಮತ್ತು ಶೋಷಿತ ಸಮುದಾಯಗಳ ವಿಚಾರದಲ್ಲಿ ಪೆರಿಯಾರ್ ಅವರ ನಿಲುವು ತೀವ್ರವಾಗಿತ್ತು. ಜಾತಿಯ ಅವಮಾನದಿಂದ ಮುಕ್ತಿ ಪಡೆಯಲು ಧರ್ಮಾಂತರವೂ ಒಂದು ಸಾಮಾಜಿಕ ಮಾರ್ಗವಾಗಬಹುದು ಎಂದು ಅವರು ವಾದಿಸಿದ್ದರು. ಈ ಸಂದರ್ಭದಲ್ಲಿ ಇಸ್ಲಾಂ ಧರ್ಮದ ಸ್ವಾಭಿಮಾನ, ಸಮಾನತೆ ಮತ್ತು ಸಹೋದರತ್ವದ ತತ್ವಗಳನ್ನು ಅವರು ಶೋಷಿತ ಸಮುದಾಯಗಳ ಮುಂದೆ ಪರ್ಯಾಯವಾಗಿ ಪ್ರಸ್ತಾಪಿಸಿದರು. ಅವರ ದೃಷ್ಟಿಯಲ್ಲಿ ಭಾರತದಲ್ಲಿ ವಿಶೇಷವಾಗಿ ದಕ್ಷಿಣ ಭಾರತದಲ್ಲಿ ಮತಾಂತರ ಅಥವಾ ಧರ್ಮಾಂತರವು ಕೇವಲ ಧಾರ್ಮಿಕ ಆಯ್ಕೆಯಾಗಿರದೆ, ಕೆಲ ಸಂದರ್ಭಗಳಲ್ಲಿ ಸ್ವಾಭಿಮಾನ ಮತ್ತು ಸಾಮಾಜಿಕ ಗೌರವದ ಪ್ರಶ್ನೆಯಾಗಿತ್ತು. ಈ ಕಾಲಘಟ್ಟದಲ್ಲಿಯೇ ಅಂಬೇಡ್ಕರರು ಸಹ ‘ನಾನು ಹಿಂದೂವಾಗಿ ಹುಟ್ಟಿದ್ದೇನೆ ಆದರೆ ಹಿಂದುವಾಗಿ ಸಾಯಲಾರೆ’ ಎಂಬ ನಿಲುವನ್ನು ತಾಳಿದ್ದರು.
ಪೆರಿಯಾರರ ರಾಜಕೀಯ ಚಿಂತನೆಯ ಮತ್ತೊಂದು ಆಯಾಮವೆಂದರೆ ಮುಸ್ಲಿಂ ಸಮುದಾಯದೊಂದಿಗೆ ಅವರು ಬೆಳೆಸಿದ ರಾಜಕೀಯ–ಸಾಮಾಜಿಕ ಸಹಕಾರ. ದ್ರಾವಿಡ ಚಳವಳಿ ಮತ್ತು ಮುಸ್ಲಿಂ ರಾಜಕೀಯ ಸಂಘಟನೆಗಳ ನಡುವೆ ಹಲವು ಸಂದರ್ಭಗಳಲ್ಲಿ ಸಹಕಾರವೂ ಕಂಡು ಬಂತು. ವಿಶೇಷವಾಗಿ ಮಾಪಿಳ್ಳೆ ಆಂದೋಲನದ ಕಾಲಘಟ್ಟದಲ್ಲಿ.
ಬ್ರಾಹ್ಮಣ್ಯದ ಪ್ರಾಬಲ್ಯ ಮತ್ತು ಜಾತಿಯ ಕಾರಣಕ್ಕಾಗಿ ನಡೆಯುವ ಸಾಮಾಜಿಕ ಅಸಮಾನತೆಯ ವಿರುದ್ಧ ಹೋರಾಡುವ ವಿವಿಧ ಸಮುದಾಯಗಳ ನಡುವೆ ಒಗ್ಗಟ್ಟು ಅಗತ್ಯವೆಂದು ಪೆರಿಯಾರ್ ಪ್ರತಿಪಾದಿಸಿದ್ದರು.
ಪ್ರಗತಿಪರ ಚಿಂತಕರಾಗಿದ್ದ ಪೆರಿಯಾರ್, ತಮಿಳು ಸಮಾಜದಲ್ಲಿದ್ದ ಜಾತಿ ಪದ್ಧತಿ ಮತ್ತು ಅಸ್ಪೃಶ್ಯತೆಯನ್ನು ನಿರ್ಮೂಲನೆ ಮಾಡಲು ಇಸ್ಲಾಂ ಧರ್ಮವನ್ನು ಒಂದು ಪ್ರಮುಖ ಮಾರ್ಗವಾಗಿ ಕಂಡರು.
ಪೆರಿಯಾರ್ ಅವರು ಇಸ್ಲಾಂ ಧರ್ಮದಲ್ಲಿದ್ದ ಸಾಮಾಜಿಕ ಸಮಾನತೆ ಮತ್ತು ಸಹೋದರತ್ವದ ತತ್ವಗಳನ್ನು ತೀವ್ರವಾಗಿ ಶ್ಲಾಘಿಸಿದರು. ಹಿಂದೂ ಧರ್ಮದಲ್ಲಿದ್ದ ಜಾತೀಯತೆ, ಮೇಲು-ಕೀಳು ಮತ್ತು ತಾರತಮ್ಯಕ್ಕೆ ಇಸ್ಲಾಂನಲ್ಲಿ ಜಾಗವಿಲ್ಲ ಎಂದು ಅವರು ನಂಬಿದ್ದರು.
1930-40ರ ದಶಕಗಳಲ್ಲಿ ತಮಿಳುನಾಡಿನಲ್ಲಿ ದಲಿತರು ಮತ್ತು ಹಿಂದುಳಿದ ವರ್ಗಗಳ ಮೇಲಿನ ದೌರ್ಜನ್ಯ ಹೆಚ್ಚಾದಾಗ, ಪೆರಿಯಾರ್ ಅವರು ಶೋಷಿತ ಸಮುದಾಯಗಳಿಗೆ ಇಸ್ಲಾಂ ಧರ್ಮಕ್ಕೆ ಮತಾಂತರವಾಗಲು ಕರೆ ನೀಡಿದರು. ಜಾತಿ ವ್ಯವಸ್ಥೆಯ ಕ್ರೂರತೆಯಿಂದ ಮುಕ್ತಿ ಪಡೆಯಲು ಮತ್ತು ಸ್ವಾಭಿಮಾನದ ಜೀವನ ನಡೆಸಲು ಇಸ್ಲಾಂ ಅತ್ಯುತ್ತಮ ಪರ್ಯಾಯ ಎಂದು ಅವರು ವಾದಿಸಿದರು. “ನಿಮಗೆ ಗೌರವ ಬೇಕಾದರೆ, ಜಾತೀಯತೆಯಿಂದ ಮುಕ್ತಿ ಬೇಕಾದರೆ ಇಸ್ಲಾಂ ಧರ್ಮವನ್ನು ಸ್ವೀಕರಿಸಿ” ಎಂಬುದು ಅವರ ಪ್ರಸಿದ್ಧ ಘೋಷಣೆಗಳಲ್ಲೊಂದಾಗಿತ್ತು.
ಪೆರಿಯಾರ್ ನೇತೃತ್ವದ ‘ದ್ರಾವಿಡ ಕಳಗಂ’ (DK) ಮತ್ತು ಮೊಹಮ್ಮದ್ ಅಲಿ ಜಿನ್ನಾ ನೇತೃತ್ವದ ‘ಮುಸ್ಲಿಂ ಲೀಗ್’ ನಡುವೆ ರಾಜಕೀಯ ಮತ್ತು ಸಾಮಾಜಿಕ ಒಕ್ಕೂಟವಿತ್ತು. ದ್ರಾವಿಡರು (ದಕ್ಷಿಣ ಭಾರತೀಯರು) ಮತ್ತು ಮುಸ್ಲಿಮರು ಇಬ್ಬರೂ ಬ್ರಾಹ್ಮಣಶಾಹಿ ಮತ್ತು ಉತ್ತರ ಭಾರತದ ಹೆಜಮನಿಯಿಂದ ಶೋಷಿತರಾಗುತ್ತಿದ್ದಾರೆ, ಆದ್ದರಿಂದ ಇಬ್ಬರೂ ಒಟ್ಟಾಗಿ ಹೋರಾಡಬೇಕು ಎಂದು ಪೆರಿಯಾರ್ ಪ್ರತಿಪಾದಿಸಿದ್ದರು.
ಇಸ್ಲಾಂ ಧರ್ಮವನ್ನು ಅವರು ಸಮಾಜ ಸುಧಾರಣೆಯ ಒಂದು ‘ಔಷಧಿ’ ಅಥವಾ ‘ಉಪಕರಣ’ವಾಗಿ ನೋಡಿದರೇ ಹೊರತು, ಆಧ್ಯಾತ್ಮಿಕ ಕಾರಣಗಳಿಗಾಗಿ ಅಲ್ಲ.
ಇಸ್ಲಾಂನ ಸಮಾನತೆಯನ್ನು ಒಪ್ಪಿಕೊಂಡರೂ, ಕಾಲಾನಂತರದಲ್ಲಿ ಮುಸ್ಲಿಂ ಸಮುದಾಯದಲ್ಲೂ ಮೂಢನಂಬಿಕೆಗಳು ಮತ್ತು ಮಹಿಳೆಯರ ಸ್ವಾತಂತ್ರ್ಯಕ್ಕೆ ಧಕ್ಕೆ ತರುವಂತಹ ಕೆಲವು ಆಚರಣೆಗಳು (ಉದಾಹರಣೆಗೆ ಕಠಿಣ ಪರ್ದಾ ಪದ್ಧತಿ) ಬಂದಾಗ ಪೆರಿಯಾರ್ ಅವುಗಳನ್ನು ಮುಕ್ತವಾಗಿ ಟೀಕಿಸಲು ಹಿಂಜರಿಯಲಿಲ್ಲ.
ತಮಿಳುನಾಡಿನ ಇಂದಿನ ದ್ರಾವಿಡ ರಾಜಕಾರಣ ಮತ್ತು ಮುಸ್ಲಿಂ ಸಮುದಾಯದ ನಡುವಿನ ಸೌಹಾರ್ದತೆಗೆ ಪೆರಿಯಾರ್ ಅವರ ಈ ಚಿಂತನೆಗಳೇ ಬಲವಾದ ಅಡಿಪಾಯವಾಗಿವೆ.
ಇದೇ ಸಂದರ್ಭದಲ್ಲಿ ಪೆರಿಯಾರರನ್ನು ಇಸ್ಲಾಂ ಪರ ಧಾರ್ಮಿಕ ಪ್ರಚಾರಕರಾಗಿ ಅರ್ಥೈಸುವುದು ಅವರ ವೈಚಾರಿಕತೆಯನ್ನು ಸರಳೀಕರಿಸುವಂತಾಗುತ್ತದೆ. ಅವರು ಮೂಲತಃ ವಿಚಾರ, ವಿಮರ್ಶೆಯ ವಾದಿ ಮತ್ತು ನಾಸ್ತಿಕರಾಗಿದ್ದರು. ಯಾವುದೇ ಧರ್ಮದ ಆಚರಣೆಗಳು ಮನುಷ್ಯನ ಬುದ್ಧಿ, ಸಮಾನತೆ ಮತ್ತು ಸ್ವಾಭಿಮಾನದ ಮಾನದಂಡಗಳನ್ನು ಪೂರೈಸಬೇಕು ಎಂಬುದು ಅವರ ನಿಲುವಾಗಿತ್ತು. ಇಸ್ಲಾಂನಲ್ಲಿ ತಾವು ಕಂಡ ಸಮಾನತೆಯ ಅಂಶಗಳನ್ನು ಪ್ರಶಂಸಿಸಿದಂತೆಯೇ, ಮುಸ್ಲಿಂ ಸಮಾಜದಲ್ಲಿದ್ದ ಕೆಲವು ಆಚರಣೆಗಳು ಮತ್ತು ಮಹಿಳೆಯರ ಸ್ವಾತಂತ್ರ್ಯಕ್ಕೆ ಸಂಬಂಧಿಸಿದ ಪ್ರಶ್ನೆಗಳನ್ನೂ ಅವರು ಟೀಕಿಸಿದ್ದರು.
ಹೀಗಾಗಿ ಪೆರಿಯಾರ್ ಅವರ ಇಸ್ಲಾಂ ಕುರಿತ ಚಿಂತನೆಯನ್ನು ‘ಧರ್ಮದ ಪರ ಅಥವಾ ವಿರೋಧ’ ಎಂಬ ಸರಳ ಚೌಕಟ್ಟಿನಲ್ಲಿ ನೋಡುವುದಕ್ಕಿಂತ, ಜಾತಿ ನಿರ್ಮೂಲನೆ, ಸ್ವಾಭಿಮಾನ, ಸಮಾನತೆ ಮತ್ತು ತರ್ಕಬದ್ಧ ಸಮಾಜ ನಿರ್ಮಾಣದ ಅವರ ವಿಶಾಲ ಚಿಂತನೆಯ ಭಾಗವಾಗಿ ಅರ್ಥೈಸುವುದು ಸೂಕ್ತ.
ಇಂದಿನ ಭಾರತದಲ್ಲಿ ಜಾತಿ, ಧರ್ಮ ಮತ್ತು ಸಾಮಾಜಿಕ ನ್ಯಾಯದ ಕುರಿತು ನಡೆಯುತ್ತಿರುವ ಚರ್ಚೆಗಳ ನಡುವೆ ಪೆರಿಯಾರ್ ಅವರ ಈ ವಿಚಾರಗಳು ಮತ್ತೆ ಪ್ರಸ್ತುತವಾಗುತ್ತವೆ. ಅವರ ಸಂದೇಶದ ಮೂಲ ಪ್ರಶ್ನೆ ಒಂದೇ—ಮನುಷ್ಯನ ಗೌರವವನ್ನು ಜನ್ಮ ನಿರ್ಧರಿಸಬೇಕೇ, ಅಥವಾ ಸಮಾನತೆಯ ಸಮಾಜ ಅದನ್ನು ಖಚಿತಪಡಿಸಬೇಕೇ ಎಂಬುದಾಗಿತ್ತು. ಈ ವಿಚಾರಧಾರೆಯೆ ಪೆರಿಯಾರ್ ಚಿಂತನೆಯ ಶಾಶ್ವತ ಪ್ರಸ್ತುತತೆಯನ್ನು ಸೂಚಿಸುತ್ತದೆ.
ಖಾಸಿಂ ಸಾಬ್ ಎ, ಬೆಂಗಳೂರು.
ಇವರು ಕರ್ನಾಟಕದ ಪ್ರಮುಖ ಚಿಂತಕರು, ಲೇಖಕರು ಹಾಗೂ ಸಾಮಾಜಿಕ ವಿಶ್ಲೇಷಕರು
ಇದನ್ನೂ ಓದಿ- https://kannadaplanet.com/homage-the-zen-guru-of-theatre-jambe-sir/ ನುಡಿ ನಮನ | ಸುಮ್ಮನಿದ್ದರೂ ಪರಿಣಮಿಸುವ ರಂಗ ಭೂಮಿಯ ಝೆನ್ ಗುರು – ಜಂಬೆ ಮೇಷ್ಟ್ರು
