ವಾಷಿಂಗ್ಟನ್: ಅಮೆರಿಕದ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್ ಚುನಾವಣೆಯಲ್ಲಿ ಡೆಮಾಕ್ರಟಿಕ್ ಪಕ್ಷದ ನಾಯಕಿ ಇಲ್ಹಾನ್ ಒಮರ್ ಐದನೇ ಬಾರಿಗೆ ಗೆಲುವು ಸಾಧಿಸಿದ್ದಾರೆ. ಮಿನ್ನೇಸೋಟದ 5ನೇ ಕ್ಷೇತ್ರದಿಂದ ಮರು ಆಯ್ಕೆಯಾಗಿರುವ ಅವರು, ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿ ಜಾನ್ ನಾಗೆಲ್ ಅವರನ್ನು ಸೋಲಿಸಿದ್ದಾರೆ.
ಇಲ್ಹಾನ್ ಒಮರ್ ಶೇ.76.45ರಷ್ಟು ಮತಗಳನ್ನು ಪಡೆದಿದ್ದರೆ, ಜಾನ್ ನಾಗೆಲ್ ಶೇ.16.26ರಷ್ಟು ಮತಗಳನ್ನು ಗಳಿಸಿದ್ದಾರೆ. ಈ ಮೂಲಕ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಟೀಕೆಗಳು ಹಾಗೂ ತಮ್ಮ ವಲಸೆ ಮತ್ತು ಗುರುತಿನ ವಿಚಾರಕ್ಕೆ ಸಂಬಂಧಿಸಿದ ಫೆಡರಲ್ ತನಿಖೆಯ ನಡುವೆಯೂ ಒಮರ್ ಮತ್ತೊಮ್ಮೆ ಗೆಲುವು ದಾಖಲಿಸಿದ್ದಾರೆ.
ಟ್ರಂಪ್ ವಿರುದ್ಧ ನಿರಂತರ ಟೀಕೆ
ಸೊಮಾಲಿ ಮೂಲದ ಇಲ್ಹಾನ್ ಒಮರ್ ಅವರು ಟ್ರಂಪ್ ಅವರ ಪ್ರಮುಖ ಟೀಕಾಕಾರರಲ್ಲಿ ಒಬ್ಬರಾಗಿದ್ದಾರೆ. ಟ್ರಂಪ್ ಅವರ ವಲಸೆ ನೀತಿ ಹಾಗೂ ವಿದೇಶಾಂಗ ನೀತಿಗಳನ್ನು ಹಲವು ಬಾರಿ ವಿರೋಧಿಸಿದ್ದಾರೆ.
ಒಮರ್ ಅವರನ್ನು ‘ಭಯಾನಕ ವ್ಯಕ್ತಿ’ ಎಂದು ಟೀಕಿಸಿದ್ದ ಟ್ರಂಪ್, ಅವರು ವಲಸೆ ಮತ್ತು ಗುರುತಿನ ವಿಚಾರದಲ್ಲಿ ವಂಚನೆ ಎಸಗಿದ್ದಾರೆ ಎಂದು ಆರೋಪಿಸಿದ್ದರು. ಅಲ್ಲದೆ, ಕಾಂಗ್ರೆಸ್ ಸದಸ್ಯತ್ವಕ್ಕೆ ರಾಜೀನಾಮೆ ನೀಡುವಂತೆ ಆಗ್ರಹಿಸಿದ್ದರು. ಆದರೆ, ತಮ್ಮ ವಿರುದ್ಧದ ಫೆಡರಲ್ ತನಿಖೆಯಲ್ಲಿ ಯಾವುದೇ ಪಾತ್ರವಿಲ್ಲ ಎಂದು ಟ್ರಂಪ್ ಹೇಳಿದ್ದಾರೆ.
ವಲಸೆ ಮತ್ತು ಗುರುತಿನ ವಿಚಾರದಲ್ಲಿ ತನಿಖೆ
ಇಲ್ಹಾನ್ ಒಮರ್ ಅವರ ವಲಸೆ ಸ್ಥಿತಿ ಮತ್ತು ಗುರುತಿನ ಕುರಿತು ಫೆಡರಲ್ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ. ಈ ಪ್ರಕರಣದ ಭಾಗವಾಗಿ ಅಧಿಕಾರಿಗಳು ಅವರ ನಿವಾಸದಲ್ಲಿ ಶೋಧ ನಡೆಸಿ, ಮೊಬೈಲ್ ಫೋನ್‌ಗಳು, ದಾಖಲೆಗಳು ಹಾಗೂ ಇತರ ಎಲೆಕ್ಟ್ರಾನಿಕ್ ಸಾಧನಗಳನ್ನು ವಶಪಡಿಸಿಕೊಂಡಿದ್ದರು.
ಮಾಜಿ ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮಾ ಅವರು ಕೂಡ ಈ ವಿಚಾರವಾಗಿ ಪ್ರತಿಕ್ರಿಯಿಸಿದ್ದರು. ಅಧ್ಯಕ್ಷರನ್ನು ಟೀಕಿಸುವ ಧೈರ್ಯ ತೋರಿದ್ದಕ್ಕಾಗಿಯೇ ಟ್ರಂಪ್ ಅವರು ಒಮರ್ ಅವರನ್ನು ಗುರಿಯಾಗಿಸಿಕೊಂಡಿದ್ದಾರೆ ಎಂದು ಒಬಾಮಾ ಆರೋಪಿಸಿದ್ದರು.
ಟ್ರಂಪ್ ಅವರ ಟೀಕೆಗಳು ಮತ್ತು ತನಿಖೆಯ ನಡುವೆಯೂ ಇಲ್ಹಾನ್ ಒಮರ್ ಐದನೇ ಬಾರಿಗೆ ಗೆಲುವು ಸಾಧಿಸಿರುವುದು ಅಮೆರಿಕದ ರಾಜಕೀಯ ವಲಯದಲ್ಲಿ ಗಮನ ಸೆಳೆದಿದೆ.
