ಉತ್ತರ ಪ್ರದೇಶ : ಮಾಜಿ ಮುಖ್ಯಮಂತ್ರಿ ಬಿಎಸ್ಪಿ ಮುಖ್ಯಸ್ಥೆ ಮಾಯಾವತಿ ಅವರು ಗುರುವಾರ ತಮ್ಮ ಸೋದರಳಿಯ ಆಕಾಶ್ ಆನಂದ್ ಅವರನ್ನು ಪಕ್ಷದಿಂದ ಸಂಪೂರ್ಣವಾಗಿ ಹೊಗಿಡಲಾಗಿದೆ ಎಂದು ಘೋಷಿಸಿದರು.
ಇದಕ್ಕೂ ಸ್ವಲ್ಪ ಸಮಯದ ಮುನ್ನವೇ, ಆನಂದ್ ಅವರ ಮಾವ ಹಾಗೂ ಮಾಜಿ ರಾಜ್ಯಸಭಾ ಸದಸ್ಯ ಅಶೋಕ್ ಸಿದ್ಧಾರ್ಥ್ ಅವರು ರಾಜಕೀಯ ಮತ್ತು ಸಾಮಾಜಿಕ ಜೀವನದಿಂದ ನಿವೃತ್ತಿ ಘೋಷಿಸಿದ್ದರು.
ಸಿದ್ಧಾರ್ಥ್ ತಮ್ಮ ರಾಜಕೀಯ ಮಹತ್ವಾಕಾಂಕ್ಷೆಗಳನ್ನು ತ್ಯಜಿಸಿದರೆ ಮಾತ್ರ ಆನಂದ್ ಅವರಿಗೆ ಪಕ್ಷದಲ್ಲಿನ ಜವಾಬ್ದಾರಿಗಳನ್ನು ಮರುಹೊಂದಿಸುವ ಬಗ್ಗೆ ಪರಿಶೀಲಿಸಲಾಗುವುದು ಎಂದು ಮಾಯಾವತಿ ಹೇಳಿದ್ದರು. ಅಂದರೆ, ಆನಂದ್ ಅವರ ರಾಜಕೀಯ ಭವಿಷ್ಯವನ್ನು ಸಿದ್ಧಾರ್ಥ್ ಅವರ ನಿವೃತ್ತಿಯೊಂದಿಗೆ ಜೋಡಿಸಿದ ಮರುದಿನವೇ ಮಾಯಾವತಿ ಈ ಘೋಷಣೆ ಮಾಡಿದರು.
ಆದರೆ, ಗುರುವಾರ ಸಿದ್ಧಾರ್ಥ್ ನಿವೃತ್ತಿ ಘೋಷಿಸಿದ ನಂತರ, ಆನಂದ್ ಅವರ ವೈಯಕ್ತಿಕ ಮತ್ತು ಕೌಟುಂಬಿಕ ಹಿತಾಸಕ್ತಿಗಳು ಅವರ ರಾಜಕೀಯ ವೃತ್ತಿಜೀವನ ಹಾಗೂ ಬಿಎಸ್ಪಿಯ ಹಿತಾಸಕ್ತಿಗಳಿಗಿಂತ ಹೆಚ್ಚು ಪ್ರಮುಖವಾಗಿವೆ ಎಂದು ತೋರುತ್ತಿದೆ ಎಂದು ಮಾಯಾವತಿ ಹೇಳಿದರು. ದ್ವಂದ್ವ ಮನಸ್ಥಿತಿಯನ್ನು ಹೊಂದಿರುವ ಆನಂದ್ ಪಕ್ಷಕ್ಕಾಗಿ ಪರಿಣಾಮಕಾರಿಯಾಗಿ ಕೆಲಸ ಮಾಡಲು ಸಾಧ್ಯವೇ ಎಂದು ಅವರು ಪ್ರಶ್ನಿಸಿದರು.
2024ರ ಮೇನಲ್ಲಿ ಲೋಕಸಭಾ ಚುನಾವಣಾ ಪ್ರಚಾರದ ಸಮಯದಲ್ಲಿ ಮಾಯಾವತಿ ಅವರು ಆಕಾಶ್ ಆನಂದ್ ಅವರನ್ನು ರಾಷ್ಟ್ರೀಯ ಸಂಯೋಜಕ ಹುದ್ದೆಯಿಂದ ತೆಗೆದುಹಾಕಿದ್ದರು. ಅವರು ಇನ್ಮುಂದೆ ತಮ್ಮ ಉತ್ತರಾಧಿಕಾರಿಯಲ್ಲ ಎಂದು ಹೇಳಿದ್ದರು. ಮಾಯಾವತಿ 2024ರ ಆಗಸ್ಟ್ನಲ್ಲಿ ಆಕಾಶ್ ಆನಂದ್ ಅವರನ್ನು ಮತ್ತೆ ನೇಮಿಸಿಕೊಂಡಿದ್ದರು. ಹರಿಯಾಣ, ಮಹಾರಾಷ್ಟ್ರ, ಜಾರ್ಖಂಡ್ ಮತ್ತು ದೆಹಲಿಯಲ್ಲಿ ನಡೆದ ವಿಧಾನಸಭಾ ಚುನಾವಣೆಗಳಲ್ಲಿ ಪ್ರಚಾರವನ್ನು ಮುನ್ನಡೆಸುವ ಜವಾಬ್ದಾರಿಯನ್ನು ಅವರಿಗೆ ವಹಿಸಿದ್ದರು.
‘ಎಕ್ಸ್’ (X) ನಲ್ಲಿ ಮಾಯಾವತಿ ಅವರ ಹಿಂದಿನ ಪೋಸ್ಟ್ ಅನ್ನು ಮರು-ಪೋಸ್ಟ್ ಮಾಡಲು ಆನಂದ್ ವಿಫಲರಾಗಿದ್ದು, ಅವರು ಬಿಎಸ್ಪಿ ಮತ್ತು ಅದರ ಚಳುವಳಿಗಿಂತ ಕೌಟುಂಬಿಕ ಬಾಂಧವ್ಯಗಳಿಗೆ ಹೆಚ್ಚು ಒತ್ತು ನೀಡುತ್ತಿದ್ದಾರೆ ಎಂಬುದನ್ನು ತೋರಿಸುತ್ತದೆ ಎಂದೂ ಮಾಯಾವತಿ ಹೇಳಿದರು.
ಆದ್ದರಿಂದ, ಸೆಪ್ಟೆಂಬರ್ 3 ರಂದು ರಾಷ್ಟ್ರೀಯ ಸಂಯೋಜಕ ಹುದ್ದೆಯ ಎಲ್ಲಾ ಪ್ರಮುಖ ಜವಾಬ್ದಾರಿಗಳಿಂದ ಅವರನ್ನು ಹೇಗೆ ಮುಕ್ತಗೊಳಿಸಲಾಯಿತೋ, ಹಾಗೆಯೇ ಈಗ ಅವರನ್ನು ಇಂದಿನಿಂದ ಪಕ್ಷದಿಂದಲೂ ಸಂಪೂರ್ಣವಾಗಿ ಮುಕ್ತಗೊಳಿಸಬೇಕು ಎಂದು ಪಕ್ಷದ ಜನರು ಭಾವಿಸುತ್ತಾರೆ. ಹೀಗಾಗಿ, ಆಕಾಶ್ ಆನಂದ್ ಪಕ್ಷದಲ್ಲಿ ಸ್ವತಂತ್ರವಾಗಿ ಉಳಿಯಲು ಬಯಸಿದರೆ, ಅವರು ಹಾಗೆ ಮಾಡಲು ಮುಕ್ತರಾಗಿದ್ದಾರೆ; ಅಂದರೆ, ಅವರನ್ನು ಈಗ ಪಕ್ಷದಿಂದ ಸಂಪೂರ್ಣವಾಗಿ ಮುಕ್ತಗೊಳಿಸಲಾಗಿದೆ ಎಂದು ಮಾಯಾವತಿ ‘ಎಕ್ಸ್’ನಲ್ಲಿ ಪೋಸ್ಟ್ ಮಾಡಿದ್ದಾರೆ.
