ಈ ನೆಲದ ಸಾಂಸ್ಕೃತಿಕ ಚರಿತ್ರೆಯನ್ನು ಬಗೆದು ಬರೆದು ಜಗತ್ತಿನ ಮುಂದೆ ಅನಾವರಣಗೊಳಿಸಿದ ಹಳ್ಳಿ ಹೈದ ಬಿಳಿಮಲೆಯವರ ಸಾಧನೆ ಅಚ್ಚರಿ ಮತ್ತು ವಿಸ್ಮಯ-  ದುರ್ಗಾ ಕುಮಾರ್‌ ನಾಯರ್‌ ಕೆರೆ

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಡಾ. ಪುರುಷೋತ್ತಮ ಬಿಳಿಮಲೆ ಯವರಿಗೆ ಕುಟುಂಬ ಸನ್ಮಾನ

ಸುಳ್ಯದ ಹೆಸರನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬೆಳಗಿಸಿದ ಸಾಧಕ: ಗಣ್ಯರ ಅಭಿಮತ

ಪದವಿ ಹೋದರೂ ಚಿಂತೆಯಿಲ್ಲ; ಕನ್ನಡದ ಕಾರ್ಯ ಯೋಜನೆಗೆ ಪ್ರಾಮಾಣಿಕೆ ಸೇವೆ : ಬಿಳಿಮಲೆ

ಸುಳ್ಯ : ಬದುಕಿನುದ್ದಕ್ಕೂ ಸವಾಲುಗಳನ್ನು ಮೆಟ್ಟಿ ನಿಂತು ಅದನ್ನೇ ಸಾಧನೆಯ ಮೆಟ್ಟಲಾಗಿಸಿ ಬೆಳೆದವರು ಪುರುಷೋತ್ತಮ ಬಿಳಿಮಲೆಯವರು. ಅವರ ವಿದ್ವತ್ತು, ಸಂಶೋಧನಾ ನೆಲೆ, ಕನ್ನಡದ ಕುರಿತಾದ ದೂರದೃಷ್ಟಿ, ಸಂಘಟನಾ ಚತುರತೆ ಮತ್ತು ಈ ನೆಲದ ಸಾಂಸ್ಕೃತಿಕ ಚರಿತ್ರೆಯನ್ನು ಬಗೆದು ಬರೆದ ರೀತಿ ಎಲ್ಲವೂ ಅದ್ಭುತ. ಜನಪದ ಸಾಹಿತ್ಯವನ್ನು ಗಂಭೀರವಾಗಿ ಅಭ್ಯಸಿಸಿರುವ ಬಿಳಿಮಲೆಯವರು ಆ ಮೂಲಕ  ಶಿಷ್ಟ ಸಾಹಿತ್ಯದ ಹಲವು ಜನ ವಿರೋಧಿ ನೆಲೆಗಳನ್ನು ಗಂಭೀರವಾಗಿ ಪ್ರಶ್ನಿಸಿದವರು. ಸಂಶೋಧಕರಾಗಿ ಹೊಸ ದಿಕ್ಕು ತೋರಿದವರು ಎಂದು ಸುಳ್ಯ ಸುದ್ದಿ ಚಾನೆಲ್ ಮುಖ್ಯಸ್ಥ ದುರ್ಗಾಕುಮಾರ್ ನಾಯರ್ ಕೆರೆಯವರು ಹೇಳಿದರು.

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಡಾ. ಪುರುಷೋತ್ತಮ ಬಿಳಿಮಲೆ ಯವರಿಗೆ ಕಾನಡ್ಕ ಕುಟುಂಬದ ಬಿಳಿಮಲೆ ವಿಭಾಗವು ಡಿ. 8 ರಂದು ಬಿಳಿಮಲೆಯ ವನಸ್ಮೃತಿ ಮನೆಯಲ್ಲಿ ಹಮ್ಮಿಕೊಂಡ  ಕುಟುಂಬ ಸನ್ಮಾನ ಕಾರ್ಯಕ್ರಮದಲ್ಲಿ ಅವರು ಅಭಿನಂದನಾ ಮಾತುಗಳನ್ನು ಆಡುತ್ತಿದ್ದರು.

ಬಿಳಿಮಲೆಯವರು ವರ್ತಮಾನದಲ್ಲಿ ಯಾಕೆ ಮುಖ್ಯವಾಗುತ್ತಾರೆ ಎಂಬುದರತ್ತ ಬೆಟ್ಟು ಮಾಡುತ್ತಾ ಇತರರನ್ನು  ಬೆಳೆಸುವ ದೊಡ್ಡ ಗುಣ ಯಾರಲ್ಲಿ ಇದೆಯೋ ಅವರು ಎಲ್ಲರಿಗಿಂತ ಎತ್ತರದಲ್ಲಿರುತ್ತಾರೆ ಎಂಬ ಮಾತಿಗೆ ಪರ್ಯಾಪ್ತರಾಗಿ ಬಿಳಿಮಲೆಯವರು ಇದ್ದಾರೆ. ಅವರು ಯುವ ತಲೆಮಾರನ್ನು ಸಮಾಜಮುಖಿಯಾಗಿ ಬೆಳೆಸಿದವರು. ಸಂಶೋಧಕರಿಗೆ ನಿಜ ಅರ್ಥದ ಮಾರ್ಗದರ್ಶಕರಾದವರು. ಸುಳ್ಯ ಪರಿಸರದ ಸಾಂಸ್ಕೃತಿಕ ಬೆಳವಣಿಗೆಯಲ್ಲಿ ಅಧ್ಯಾಪಕನಾಗಿ ಬಹು ದೊಡ್ಡ ಪಾತ್ರ ವಹಿಸಿದವರು. ತನಗೆದುರಾದ ಸೃಜನಶೀಲ ಕ್ಷೇತ್ರಗಳ ಸವಾಲುಗಳನ್ನು ದಿಟ್ಟತನದಿಂದ ಎದುರಿಸಿ ಇತರರಿಗೆ ಮಾದರಿಯಾದವರು. ಮುಂದೆ ಕ್ರಮಿಸಬೇಕಾದ ಹಾದಿಯ ದೂರದೃಷ್ಟಿಯ ಯೋಜನೆ, ಎಲ್ಲರನ್ನು ಸೇರಿಸಿಕೊಂಡು ಮುನ್ನಡೆಯುವ ಮನಸು ಇವೆಲ್ಲವೂ ಬಿಳಿಮಲೆಯವರನ್ನು ಇಷ್ಟು ದೊಡ್ಡಮಟ್ಟದಲ್ಲಿ ಬೆಳೆಸಿವೆ. ಸಂಪುಟ ದರ್ಜೆಯ ಸ್ಥಾನ ಮಾನದ ದೊಡ್ಡ ಹುದ್ದೆ ಅವರನ್ನು ಅರಸಿ ಬಂದಿರುವುದು ದ.ಕ ಜಿಲ್ಲೆಗೂ, ಬಿಳಿಮಲೆ ಕುಟುಂಬಕ್ಕೂ  ಹೆಮ್ಮೆ ಮತ್ತು ಅಭಿಮಾನದ ಸಂಗತಿ ಎಂದು ಶ್ಲಾಘಿಸಿದರು.

ಮಂಗಳೂರಿನ ನಿವೃತ್ತ ಪ್ರಾಂಶುಪಾಲ ಕೆ. ಸದಾಶಿವ  ಬಿಳಿಮಲೆಯವರನ್ನು ಸನ್ಮಾನಿಸಿದರು.  ” ಪುರುಷೋತ್ತಮ ಬಿಳಿಮಲೆಯವರು ಎಷ್ಟೇ ಎತ್ತರಕ್ಕೆ ಹೋದರೂ ಅದೇ ಸರಳತೆ ಮತ್ತು ಬಾಂಧವ್ಯವನ್ನು ಉಳಿಸಿಕೊಂಡು ಮಾದರಿಯಾಗಿದ್ದಾರೆ ಎನ್ನುತ್ತಾ ಅವರೊಂದಿಗಿನ ತಮ್ಮ ಒಡನಾಟದ ನೆನಪುಗಳನ್ನು ಹಂಚಿಕೊಂಡರು.

ಸನ್ಮಾನ ಸ್ವೀಕರಿಸಿ ಮಾತನಾಡಿದ ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಡಾ.‌ ಪುರುಷೋತ್ತಮ ಬಿಳಿಮಲೆಯವರು “ಕರ್ನಾಟಕ ಸರಕಾರ ನನಗೆ ಬಹಳ ದೊಡ್ಡ ಪದವಿ ಮತ್ತು ಜವಾಬ್ದಾರಿ ನೀಡಿದೆ. ಕನ್ನಡದ ಕಾರ್ಯ ಯೋಜನೆಗಳಿಗೆ ಬೇಕಾಗಿ ಪ್ರಾಮಾಣಿಕವಾಗಿ ಮತ್ತು ನಿಷ್ಠುರವಾಗಿ ಕೆಲಸ ಮಾಡುತ್ತೇನೆ. ಪದವಿ ಹೋದರೂ ಚಿಂತೆಯಿಲ್ಲ, ಕನ್ನಡದ ಸಮಸ್ಯೆಗಳನ್ನು ಸರಕಾರಕ್ಕೆ ಮುಟ್ಟಿಸಿ ಪರಿಹಾರದ ಪ್ರಯತ್ನ ಮಾಡಿಯೇ ಮಾಡುತ್ತೇನೆ ಎಂದು ಹೇಳಿದರು.

ಕನ್ನಡ ಭಾಷೆಯ ಅಭಿವೃದ್ಧಿ, ಶಾಲೆಗಳ ಸಬಲೀಕರಣ, ಆಡಳಿತದಲ್ಲಿ ಕನ್ನಡ ಅನುಷ್ಠಾನ ಸೇರಿದಂತೆ ತಮ್ಮ ಮುಂದಿರುವ ಸವಾಲುಗಳು, ಕಾರ್ಯ ಯೋಜನೆಗಳ ಕುರಿತು ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ಕರ್ನಾಟಕದ ಸೌಹಾರ್ದ ಸಂಸ್ಕೃತಿ ಕುರಿತು ಕಡಿಮೆ ಬೆಲೆಯ ನೂರು ಪುಸ್ತಕಗಳನ್ನು ಪ್ರಕಟಿಸಿ ಶಾಲಾ ಕಾಲೇಜು ಮಕ್ಕಳಿಗೆ ಹಂಚುವ ಯೋಜನೆ ಇದೆ ಎಂದೂ ಹೇಳಿದರು.

ಪಂಬೆತ್ತಾಡಿ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದ ಅಧ್ಯಕ್ಷ ಜಾಕೆ ಮಾಧವ ಗೌಡ ಸಭಾಧ್ಯಕ್ಷತೆ ವಹಿಸಿ ಮಾತನಾಡಿ, ಪುರುಷೋತ್ತಮ ಬಿಳಿಮಲೆ ಮತ್ತು ಅವರ ಸಹೋದರರು, ಸಹೋದರಿ ಸಮಾಜದಲ್ಲಿ ಸಾಧನೆ ಮಾಡಿರುವುದರ ಹಿಂದೆ ಶೇಷಪ್ಪ ಗೌಡ, ಗಿರಿಜಾ ದಂಪತಿಯ ಶ್ರಮವಿದೆ. ಅವರ ಆದರ್ಶವನ್ನು ಮಕ್ಕಳೂ ಮೈಗೂಡಿಸಿಕೊಂಡು ಬೆಳೆದಿದ್ದಾರೆ ಎಂದರು.

ಮುಖ್ಯ ಅತಿಥಿಯಾಗಿದ್ದ ಗುತ್ತಿಗಾರು ರಬ್ಬರ್ ಬೆಳೆಗಾರರ  ಸೊಸೈಟಿ ಅಧ್ಯಕ್ಷ ನಿತ್ಯಾನಂದ ಮುಂಡೋಡಿಯವರು ತಮ್ಮ ಕುಟುಂಬದ ಸದಸ್ಯನೊಬ್ಬ ಸಾಧನೆ ಮಾಡಿದಾಗ ಅವರನ್ನು ಅಭಿನಂದಿಸುವ ಕಾರ್ಯ ಮಾಡಿದ ಕಾನಡ್ಕ ಬಿಳಿಮಲೆ ಕುಟುಂಬದ ನಡೆ ಮಾದರಿಯಾದುದು ಎಂದರು.

ಕುಟುಂಬದ ಹಿರಿಯರಾದ ಈಶ್ವರ ಗೌಡ ಬಿಳಿಮಲೆ, ಉಮೇಶ ಗೌಡ ಬಿಳಿಮಲೆ,  ಶಿವರಾಮ ಕಾನಡ್ಕ ವೇದಿಕೆಯಲ್ಲಿ ಉಪಸ್ಥಿತರಿದ್ದರು.

ಸಮಾರಂಭದ ಅತಿಥಿಗಳನ್ನು ಹಾಗೂ ಕಾರ್ಯಕ್ರಮಕ್ಕೆ ಆಗಮಿಸಿದ ಗಣ್ಯರನ್ನು ಅಭಿನಂದಿಸಲಾಯಿತು.

ಕಾರ್ಯಕ್ರಮದಲ್ಲಿ ಶ್ರೀಮತಿ ಸ್ವಾತಿ ಸುಹಾಸ್ ಪ್ರಾರ್ಥಿಸಿದರು. ಪ್ರೊ. ಪದ್ಮನಾಭ ಗೌಡ ಬಿಳಿಮಲೆ ಸ್ವಾಗತಿಸಿ ಪ್ರಸ್ತಾವನೆಗೈದರು. ಶ್ರೀಮತಿ ಗುಲಾಬಿ ಬಿಳಿಮಲೆ ಸನ್ಮಾನ ಪತ್ರ ವಾಚಿಸಿದರು. ಪುಟಾಣಿಗಳಾದ ಅದ್ವಿತಿ, ಅಯಾಂಶ್‌, ಹಂಸಿಕಾ ಅತಿಥಿಗಳಿಗೆ ಹೂ ನೀಡಿ ಸ್ವಾಗತಿಸಿದರು. ದೀಪಾ, ಸುಮಾ, ಲಿಖಿತಾಶ್ರೀ, ಲಾಲಿತ್ಯ ಬೆಳಕು ಬೆಳಗಿದರು.  ತೀರ್ಥಾನಂದ ಕೊಡೆಂಕಿರಿ ನಿರೂಪಿಸಿದರು. ಪರಮೇಶ್ವರ ಗೌಡ ಬಿಳಿಮಲೆ ವಂದಿಸಿದರು.‌