ವಯನಾಡ್ ಭೂಕುಸಿತದಿಂದಾಗಿ ನೂರಾರು ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ಇನ್ನು ಹತ್ತು ಹಲವು ಜನ ನಾಪತ್ತೆಯಾಗಿದ್ದಾರೆ. ಇದರ ನಡುವೆಯೇ ಈ ಭೂಕುಸಿತದಿಂದಾಗಿ ವಯನಾಡ್‌ನ ಚೂರಲ್‌ಮಲಾ ಗ್ರಾಮದಲ್ಲಿರುವ ವೆಲ್ಲರ್ಮಲಾ ಸರಕಾರಿ ವೊಕೇಶನಲ್‌ ಹೈಯರ್‌ ಸೆಕೆಂಡರಿ ಶಾಲೆಯ 20ಕ್ಕೂ ಅಧಿಕ ವಿದ್ಯಾರ್ಥಿಗಳು ಸಾವನ್ನಪ್ಪಿದ್ದಾರೆ.
ಶಾಲೆಯಲ್ಲಿ ಕೆಸರು, ಮರದ ದಿಮ್ಮೆಗಳು, ನುಗ್ಗಿದ ನೀರು ಉಳಿಸಿ ಹೋದ ಅವಶೇಷಗಳಿಂದ ತುಂಬಿ ಹೋಗಿದೆ. ದುರಂತದಲ್ಲಿ ಅಸುನೀಗಿದ ಗ್ರಾಮಸ್ಥರಲ್ಲಿ 20ಕ್ಕೂ ಅಧಿಕ ಶಾಲೆ ಮಕ್ಕಳಾಗಿದ್ದು, 32 ಮಕ್ಕಳು ನಾಪತ್ತೆಯಾಗಿದ್ದಾರೆ. ಶಾಲೆಯಲ್ಲಿ 497 ವಿದ್ಯಾರ್ಥಿಗಳಿದ್ದರು. ಬೋಧಕೇತರ ಸಿಬ್ಬಂದಿ ಸೇರಿದಂತೆ 31 ನೌಕರರಿದ್ದರು. ಕೆಲ ವಿದ್ಯಾರ್ಥಿಗಳು ಶಾಲೆಯಿಂದ ಸ್ವಲ್ಪ ದೂರದಲ್ಲೇ ವಾಸಿಸುತ್ತಾರೆ.
ಅವಶೇಷಗಳಡಿ ಮಕ್ಕಳ ದೇಹವನ್ನು ಹೊರ ತೆಗೆಯುವಾಗ ಅವರನ್ನು ಗುರುತಿಸಲು ಶಾಲೆ ಶಿಕ್ಷಕರನ್ನು ಕರೆದಾಗ, ಚಿಕ್ಕ ಮಕ್ಕಳ ದೇಹವನ್ನು ನೋಡಿದಾಗ ಶಿಕ್ಷಕರು ಅಸಹಾಯಕರಾಗಿ ಕಣ್ಣೀರು ಹಾಕಿದ್ದಾರೆ. ಈ ಕುರಿತು ಶಾಲಾ ಶಿಕ್ಷಕ ಆದಿಲ್‌ ಮಾಧ್ಯಮಕ್ಕೆ ಬೇಸರ ವ್ಯಕ್ತಪಡಿಸಿದ್ದಾರೆ.
