ಇರಾನ್ ವಿರುದ್ಧ ಅಮೆರಿಕ-ಇಸ್ರೇಲ್ ಸಮರ ಸಾರಿರುವ ಯುದ್ಧದ ಆರನೇ ದಿನ ಮಿಸೈಲ್ ದಾಳಿಗಳು ವ್ಯಾಪಕವಾಗಿವೆ. ಇರಾನ್ ದೇಶದೊಳಗಿನ ಪರಿಸ್ಥಿತಿ ಹದಗೆಟ್ಟಿದೆ. ಗಲ್ಫ್, ಲೆಬನಾನ್ ಮತ್ತು ಇರಾಕ್ನಲ್ಲಿ ಪ್ರಾದೇಶಿಕ ಉದ್ವಿಗ್ನತೆಗಳು ತೀವ್ರಗೊಳ್ಳುತ್ತಿವೆ.
ಇರಾನ್ ನಲ್ಲಿ ನಡೆದಿರುವ ಘಟನೆಗಳು
ಇರಾನ್ನಲ್ಲಿ ಮರಣ ಸಂಖ್ಯೆ ಹೆಚ್ಚಾಗಿದೆ. ಅಲ್ಲಿನ ಮಾಧ್ಯಮಗಳ ಪ್ರಕಾರ, ಐದು ದಿನಗಳ ದಾಳಿಯಿಂದ ಸಾವನ್ನಪ್ಪಿದವರ ಸಂಖ್ಯೆ 1,045 ಕ್ಕೆ ತಲುಪಿದೆ. 6 ಸಾವಿರಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ದೇಶಾದ್ಯಂತ 33 ನಾಗರಿಕ ಸ್ಥಳಗಳ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ದಾಳಿ ನಡೆಸಿವೆ. ಈ ಸ್ಥಳಗಳಲ್ಲಿ ಆಸ್ಪತ್ರೆಗಳು, ಶಾಲೆಗಳು, ವಸತಿ ಪ್ರದೇಶಗಳು, ಟೆಹ್ರಾನ್ ಗ್ರ್ಯಾಂಡ್ ಬಜಾರ್ ಮತ್ತು ಐತಿಹಾಸಿಕ ಗೋಲೆಸ್ತಾನ್ ಅರಮನೆಯೂ ಸೇರಿದೆ ಎಂದು ವರದಿಯಾಗಿದೆ.
ಕುರ್ದಿಶ್ ನೆಲದ ದಾಳಿ: ಇಸ್ಲಾಮಿಕ್ ಸರ್ಕಾರದ ವಿರುದ್ಧ ಕುರ್ದಿಶ್-ಇರಾನಿಯನ್ ಸಶಸ್ತ್ರ ಗುಂಪುಗಳು ವಾಯುವ್ಯ ಇರಾನ್ನಲ್ಲಿ ದಾಳಿಯನ್ನು ಪ್ರಾರಂಭಿಸಿವೆ. ಇರಾಕಿ ಕುರ್ದಿಶ್ಗಳು ಸಂಘರ್ಷಕ್ಕೆ ಸೇರುವ ಸಾಧ್ಯತೆ ಇದೆ. ಗಡಿಯಾಚೆಗಿನ ಮಿಲಿಟರಿ ಕಾರ್ಯಾಚರಣೆಗಳಲ್ಲಿ ಸಹಾಯ ಮಾಡಲು ಯುಎಸ್ ಅಧಿಕಾರಿಗಳು ಇರಾಕಿ ಕುರ್ದಿಶ್ಗಳನ್ನು ಕೇಳಿದ್ದಾರೆ ಮತ್ತು ಉತ್ತರ ಇರಾಕ್ನಲ್ಲಿರುವ ಕುರ್ದಿಶ್ ಪಡೆಗಳು ಪ್ರಸ್ತುತ ಇರಾನ್ ವಿರುದ್ಧದ ಸಂಘರ್ಷಕ್ಕೆ ಸೇರಲು ಸನ್ನದ್ಧರಾಗಿದ್ದಾರೆ ಎಂದು ಹೇಳಲಾಗಿದೆ.
ಸ್ಪೇನ್ ನಿರಾಕರಣೆ : ಯುದ್ಧಕ್ಕಾಗಿ ತನ್ನ ನೆಲೆಗಳನ್ನು ಬಳಸಲು ಅವಕಾಶ ನೀಡಲು ಸ್ಪೇನ್ ನಿರಾಕರಿಸಿದೆ. ಇದನ್ನು ಇರಾನ್ ಅಧ್ಯಕ್ಷ ಮಸೌದ್ ಪೆಜೆಶ್ಕಿಯಾನ್ ಶ್ಲಾಘಿದ್ದಾರೆ. ಆದರೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸ್ಪೇನ್ ಜೊತೆಗಿನ ಎಲ್ಲಾ ವ್ಯಾಪಾರವನ್ನು ಕಡಿತಗೊಳಿಸುವುದಾಗಿ ಬೆದರಿಕೆ ಹಾಕಿದ್ದಾರೆ.
ಗಲ್ಫ್ ರಾಷ್ಟ್ರಗಳಲ್ಲಿ ನಡೆದ ಘಟನೆಗಳು
ಪ್ರಾದೇಶಿಕ ಸ್ಥಿರತೆಗೆ ಇರಾನ್ ನ ನಿರಂತರ ಬೆದರಿಕೆಗಳ ಬಗ್ಗೆ ಸೌದಿ ಅರೇಬಿಯಾದಲ್ಲಿ ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮತ್ತು ಸೌದಿ ವಿದೇಶಾಂಗ ಸಚಿವರು ಚರ್ಚೆ ನಡೆಸಿದ್ದಾರೆ. ಹಾಗೆಯೇ, ಮಂಗಳವಾರ ರಿಯಾದ್ನಲ್ಲಿರುವ ಅಮೆರಿಕದ ರಾಯಭಾರ ಕಚೇರಿಯ ಮೇಲೆ ಇರಾನ್ ನಡೆಸಿದ ಡ್ರೋನ್ ದಾಳಿಯನ್ನು ಖಂಡಿಸಿದೆ.
ಕತಾರ್ ನ ದೋಹಾದಲ್ಲಿರುವ ಅಮೆರಿಕದ ರಾಯಭಾರ ಕಚೇರಿಯ ಬಳಿ ವಾಸಿಸುವ ನಿವಾಸಿಗಳನ್ನು ಕತಾರ್ ಸರ್ಕಾರ ಸ್ಥಳಾಂತರಿಸುತ್ತಿದೆ. ಇದು ಮುನ್ನೆಚ್ಚರಿಕೆ ಕ್ರಮ ಎಂದು ಅಲ್ಲಿನ ಆಂತರಿಕ ಸಚಿವಾಲಯ ಹೇಳಿದೆ. ಕತಾರ್ನ ವಿದೇಶಾಂಗ ಸಚಿವ ಶೇಖ್ ಮೊಹಮ್ಮದ್ ದಾಳಿಗಳನ್ನು ತಕ್ಷಣ ನಿಲ್ಲಿಸಬೇಕು ಎಂದು ಒತ್ತಾಯಿಸಿದ್ದಾರೆ.
ಕುವೈತ್ ಟ್ಯಾಂಕರ್ ಸ್ಫೋಟ: ಕುವೈತ್ನ ಮುಬಾರಕ್ ಅಲ್-ಕಬೀರ್ನ ಆಗ್ನೇಯಕ್ಕೆ ಸುಮಾರು 56 ಕಿಮೀ ದೂರದಲ್ಲಿ ಲಂಗರು ಹಾಕಲಾದ ಟ್ಯಾಂಕರ್ ಬಳಿ ಸ್ಫೋಟ ಸಂಭವಿಸಿದೆ ಎಂದು ವರದಿಯಾಗಿದೆ.
ಉಕ್ರೇನ್ನಿಂದ ಬೆಂಬಲ: ಇರಾನಿನ ಡ್ರೋನ್ ಮತ್ತು ಕ್ಷಿಪಣಿ ದಾಳಿಯಿಂದ ರಕ್ಷಿಸಲು ಉಕ್ರೇನಿಯನ್ ತಜ್ಞರನ್ನು ಈ ಪ್ರದೇಶಕ್ಕೆ ನಿಯೋಜಿಸುವ ಯೋಜನೆಗಳ ಕುರಿತು ಉಕ್ರೇನಿಯನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಕತಾರ್ ಚರ್ಚೆ ನಡೆಸಿದ್ದಾರೆ.
ಇಸ್ರೇಲ್ನಲ್ಲಿ ನಿರಂತರ ದಾಳಿಗಳು
ಟೆಹ್ರಾನ್ನಲ್ಲಿನ ಮಿಲಿಟರಿ ನೆಲೆಗಳ ವಿರುದ್ಧ ಇಸ್ರೇಲ್ ಸೇನೆಯು ಹೊಸ ದಾಳಿಗಳ ಅಲೆಯನ್ನು ಘೋಷಿಸಿದೆ.
ಮಿಲಿಟರಿ ಯಶಸ್ಸು: ಅಮೆರಿಕ ಮತ್ತು ಇಸ್ರೇಲ್ ಇರಾನ್ನ ಮಿಲಿಟರಿ ಸಾಮರ್ಥ್ಯಗಳ ಗಮನಾರ್ಹ ಭಾಗವನ್ನು ಯಶಸ್ವಿಯಾಗಿ ನಾಶಪಡಿಸಿವೆ ಎಂದು ಹೇಳಿದ್ದಾರೆ. ವಾಯು ಪ್ರಾಬಲ್ಯದ ಮೂಲಕ ಇಸ್ರೇಲ್ ಮತ್ತು ಯುಎಸ್ ಜೆಟ್ಗಳು ಇರಾನಿನ ಪ್ರದೇಶದ ಮೇಲೆ ಅವಿರೋಧವಾಗಿ ಹಾರಲು ಸಮರ್ಥವಾಗಿದೆ ಎಂದು ಇಸ್ರೇಲ್ ಹೇಳಿಕೊಂಡಿದೆ.
ಅಮೆರಿಕದಲ್ಲಿ ಯುದ್ಧ ನಿರಾಕರಿಸಿದ ಜನರು
ಯುಎಸ್ ಸೆನೆಟ್ ಟ್ರಂಪ್ ಆಡಳಿತ, ಇರಾನ್ನೊಂದಿಗೆ ಯುದ್ಧವನ್ನು ಮುಂದುವರಿಸಲು ಕಾಂಗ್ರೆಸ್ಸಿನ ಅನುಮೋದನೆ ಪಡೆಯಬೇಕೆಂದು ಒತ್ತಾಯಿಸುವುದರ ವಿರುದ್ಧ 53-47 ಮತಗಳನ್ನು ಚಲಾಯಿಸಿತು. ಇರಾನ್ ಮೇಲೆ ದಾಳಿ ಮಾಡದಿದ್ದರೆ, ಇರಾನ್ ಪರಮಾಣು ಶಸ್ತ್ರಾಸ್ತ್ರವನ್ನು ಹೊಂದಿರುತ್ತಿತ್ತು ಅಮೆರಿಕ ಅಧ್ಯಕ್ಷ ಟ್ರಂಪ್ ಸ್ವತಃ ಹೇಳಿದ್ದಾರೆ.
ಸಾರ್ವಜನಿಕ ಅಭಿಪ್ರಾಯ: ಯುದ್ಧಕ್ಕೆ ಸಾರ್ವಜನಿಕ ಬೆಂಬಲ ಕಡಿಮೆಯಾಗಿದೆ ಎಂದು ತೋರುತ್ತದೆ. ರಾಯಿಟರ್ಸ್, ಇಪ್ಸೋಸ್ ಸಮೀಕ್ಷೆಯ ಪ್ರಕಾರ, ಪ್ರತಿಕ್ರಿಯಿಸಿದವರಲ್ಲಿ ಸುಮಾರು 25ರಷ್ಟು ಜನರು ಮಾತ್ರ ಯುಎಸ್-ಇಸ್ರೇಲಿ ದಾಳಿಗಳನ್ನು ಬೆಂಬಲಿಸಿದ್ದಾರೆ, ಆದರೆ 43ರಷ್ಟು ಮಂದಿ ಯುದ್ಧ ನಿರಾಕರಿಸಿದ್ದಾರೆ.
ಆಡಳಿತದ ನಿಲುವು: ಶ್ವೇತಭವನವು ಮಿಲಿಟರಿ ಕ್ರಮವನ್ನು ಬಲವಾಗಿ ಸಮರ್ಥಿಸಿಕೊಂಡಿದೆ. ಇರಾನ್ನ ಪರಮಾಣು ಮಹತ್ವಾಕಾಂಕ್ಷೆಗಳನ್ನು ತೊಡೆದುಹಾಕುವುದು ಮತ್ತು ಅದರ ನೌಕಾಪಡೆಯನ್ನು ನಾಶಪಡಿಸುವುದು ಆಡಳಿತದ ಗುರಿಗಳಾಗಿವೆ ಎಂದು ಪತ್ರಿಕಾ ಕಾರ್ಯದರ್ಶಿ ಕ್ಯಾರೋಲಿನ್ ಲೀವಿಟ್ ಹೇಳಿದ್ದಾರೆ.
ಲೆಬನಾನ್, ಇರಾಕ್, ಟರ್ಕಿ, ಚೀನಾದಲ್ಲಿ ನಡೆದ ಘಟನೆಗಳು
ಲೆಬನಾನ್ ಸಂಘರ್ಷ: ಲೆಬನಾನ್ನಲ್ಲಿ ಪರಿಸ್ಥಿತಿ ಉಲ್ಬಣಗೊಳ್ಳುತ್ತಿದೆ. ಬೈರುತ್ ಮತ್ತು ಖಿಯಾಮ್ ಸೇರಿದಂತೆ ಪ್ರದೇಶಗಳ ಮೇಲೆ ಇಸ್ರೇಲ್ ದಾಳಿ ಮಾಡುತ್ತಿದೆ. ಹೆಜ್ಬೊಲ್ಲಾ ಜೊತೆ ಭಾರೀ ಗುಂಡಿನ ಚಕಮಕಿ ನಡೆಸುತ್ತಿದೆ.
ಇರಾಕ್: ಎರ್ಬಿಲ್ ವಿಮಾನ ನಿಲ್ದಾಣದ ಬಳಿಯ ಕಟ್ಟಡಕ್ಕೆ ಡ್ರೋನ್ ಡಿಕ್ಕಿ ಹೊಡೆದಿದೆ . ಉತ್ತರ ಇರಾಕ್ನಲ್ಲಿರುವ ಕುರ್ದಿಶ್ ಪಡೆಗಳು ಗಡಿಯಾಚೆಗಿನ ಕಾರ್ಯಾಚರಣೆಗಾಗಿ ಕಾದುನಿಂತಿದೆ.
ಕ್ಷಿಪಣಿ ಪ್ರತಿಬಂಧ: ಪೂರ್ವ ಮೆಡಿಟರೇನಿಯನ್ನಲ್ಲಿರುವ ನ್ಯಾಟೋ ವಾಯು ರಕ್ಷಣಾ ಪಡೆಗಳು ಟರ್ಕಿಯ ವಾಯುಪ್ರದೇಶವನ್ನು ಪ್ರವೇಶಿಸಿದೆ. ಇರಾನಿನ ಬ್ಯಾಲಿಸ್ಟಿಕ್ ಕ್ಷಿಪಣಿಯನ್ನು ಹೊಡೆದುರುಳಿಸಿದೆ.
ಚೀನಾ: ಚೀನಾದ ವಿದೇಶಾಂಗ ಸಚಿವರು, ಅಮೆರಿಕ ಮತ್ತು ಇಸ್ರೇಲ್ ನಡೆಸುತ್ತಿರುವ ದಾಳಿ ಕ್ರಮವನ್ನು ತಕ್ಷಣ ನಿಲ್ಲಿಸುವಂತೆ ಹೇಳಿದ್ದಾರೆ.
