ಚೆನ್ನೈ: ಡಿಎಂಕೆ ನಾಯಕ ಸ್ಟಾಲಿನ್ ಅವರು ಮುಖ್ಯಮಂತ್ರಿ ವಿಜಯ್ ಅವರ ವಿಧಾನಸಭಾ ಭಾಷಣವನ್ನು ಟೀಕಿಸಿ, ಸಾರ್ವಜನಿಕ ಮಹತ್ವದ ವಿಚಾರಗಳನ್ನು ಚರ್ಚಿಸುವ ಬದಲು ಸದನವನ್ನು ನಾಟಕೀಯ ಪ್ರದರ್ಶನವಾಗಿ ಬಳಸಿದ್ದಾರೆ ಎಂದು ಆರೋಪಿಸಿದ್ದಾರೆ.
ತಮಿಳುನಾಡು ಮುಖ್ಯಮಂತ್ರಿ ಹಾಗೂ ತಮಿಳಗ ವೆಟ್ರಿ ಕಳಗಂ (ಟಿವಿಕೆ) ಪಕ್ಷದ ನಾಯಕ ವಿಜಯ್ ಅವರು ವಿಧಾನಸಭೆಯಲ್ಲಿ ಮಾಡಿದ ಭಾಷಣವು ಅದರ ಸಿನೆಮಾ ಶೈಲಿ ಮತ್ತು ನಾಟಕೀಯ ಕ್ಷಣಗಳಿಂದ ಸಾಕಷ್ಟು ಗಮನ ಸೆಳೆದಿತ್ತು.
ಭಾಷಣದ ವೇಳೆ ಡಿಎಂಕೆ ಸದಸ್ಯರು ಸದನದಿಂದ ಹೊರನಡೆದರೂ, ವಿಜಯ್ ತಮ್ಮ ಭಾಷಣವನ್ನು ಮುಂದುವರಿಸಿದರು. ಬಳಿಕ ಸ್ಟಾಲಿನ್ ಅವರಿಗೆ ಸಂಬಂಧಿಸಿದ ಒಂದು ಸನ್ನೆಯನ್ನು ಮರುಸೃಷ್ಟಿಸಿದ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಯಿತು.
ವಿಜಯ್ ಭಾಷಣದ ಬಗ್ಗೆ ಸ್ಟಾಲಿನ್ ಪ್ರಶ್ನೆ
ವಿಜಯ್ ಅವರ ಭಾಷಣದ ಚಿತ್ರೀಕರಣದ ವಿಧಾನವನ್ನೂ ಸ್ಟಾಲಿನ್ ಪ್ರಶ್ನಿಸಿದರು. ವಿರೋಧ ಪಕ್ಷದ ಅಡ್ಡಿಪಡಿಸುವಿಕೆ ಇಲ್ಲದೆ ಮುಖ್ಯಮಂತ್ರಿ ಭಾಷಣವನ್ನು ಸಿನಿಮಾದ ದೃಶ್ಯದಂತೆ ಒಂದೇ ಟೆಕ್ನಲ್ಲಿ ಚಿತ್ರೀಕರಿಸಲು ಸಭಾಧ್ಯಕ್ಷರು ಅವಕಾಶ ನೀಡಬಾರದಿತ್ತು ಎಂದು ಅವರು ಹೇಳಿದರು.
“ರಾಜ್ಯಪಾಲರ ಭಾಷಣಕ್ಕೆ ಉತ್ತರಿಸುವ ನೆಪದಲ್ಲಿ ಮುಖ್ಯಮಂತ್ರಿ ಪೂರ್ವಸಿದ್ಧ ಟೀಕೆಗಳು ಮತ್ತು ಆರೋಪಗಳನ್ನೇ ಮಂಡಿಸಿದರು. ವಿಧಾನಸಭೆಯ ನೇರಪ್ರಸಾರ ಕ್ಯಾಮೆರಾವನ್ನು ಸಿನಿಮಾ ಕ್ಯಾಮೆರಾವಿನಂತೆ ಬಳಸಿಕೊಂಡು, ವಿರೋಧ ಪಕ್ಷದ ಮಧ್ಯಪ್ರವೇಶವಿಲ್ಲದೆ ಒಂದೇ ಟೆಕ್ನಲ್ಲಿ ಭಾಷಣವನ್ನು ಚಿತ್ರೀಕರಿಸಲು ಸಭಾಧ್ಯಕ್ಷರು ಅವಕಾಶ ನೀಡಿದ್ದು ಸರಿಯಲ್ಲ,” ಎಂದು ಸ್ಟಾಲಿನ್ ಹೇಳಿದ್ದಾರೆ.
ಇನ್ನೂ ವಿಜಯ್ ಅವರ ಭಾಷಣದಲ್ಲಿ ಪ್ರಮುಖ ಸಮಸ್ಯೆಗಳ ಕುರಿತು ಉತ್ತರಗಳಿರಲಿಲ್ಲ ಎಂದು ಆರೋಪಿಸಿದ ಸ್ಟಾಲಿನ್, “ಮುಖ್ಯಮಂತ್ರಿಯ ಉತ್ತರದಲ್ಲಿ ಆಧಾರರಹಿತ ಆರೋಪಗಳು ಮತ್ತು ‘ಪಂಚ್ ಡೈಲಾಗ್’ಗಳಷ್ಟೇ ಇದ್ದವು. ವಿದ್ಯುತ್ ವ್ಯತ್ಯಯ, ರೈತರ ಸಮಸ್ಯೆಗಳು, ಹದಗೆಡುತ್ತಿರುವ ಕಾನೂನು-ಸುವ್ಯವಸ್ಥೆ ಹಾಗೂ ಚುನಾವಣಾ ಭರವಸೆಗಳನ್ನು ಈಡೇರಿಸುವ ಯೋಜನೆಗಳ ಬಗ್ಗೆ ಯಾವುದೇ ಸ್ಪಷ್ಟ ಉತ್ತರ ನೀಡಲಿಲ್ಲ,” ಎಂದು ಹೇಳಿದರು.
