ಬೆಂಗಳೂರು ಏ.10: ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡವು ಐಪಿಎಲ್ 2026ರಲ್ಲಿ ಸತತ ಎರಡು ಗೆಲುವುಗಳೊಂದಿಗೆ ಭರ್ಜರಿ ಆರಂಭ ಪಡೆದಿದೆ. ಇದೀಗ ತಂಡವು ತನ್ನ ಮೊದಲ ಹೊರಗಿನ ಪಂದ್ಯವನ್ನು ಆಡಲು ಸಜ್ಜಾಗಿದ್ದು, ಗುವಾಹಟಿಯಲ್ಲಿ ಬಲಿಷ್ಠ ರಾಜಸ್ಥಾನ ರಾಯಲ್ಸ್ ತಂಡವನ್ನು ಎದುರಿಸಲಿದೆ. ಈ ಸಂದರ್ಭದಲ್ಲಿ ಮಾತನಾಡಿದ ಟಿಮ್ ಡೇವಿಡ್, ಬೆಂಗಳೂರು ನಗರದ ಮೇಲಿರುವ ತಮ್ಮ ಪ್ರೀತಿ ಮತ್ತು ಸತತ ಗೆಲುವಿನ ಒತ್ತಡದ ಬಗ್ಗೆ ಹಂಚಿಕೊಂಡಿದ್ದಾರೆ.
ಬೆಂಗಳೂರು ಅಭಿಮಾನಿಗಳಿಗೆ ಡೇವಿಡ್ ಫಿದಾ
ಬೆಂಗಳೂರಿನಲ್ಲಿ ಕಳೆದ ಸಮಯದ ಬಗ್ಗೆ ನೆನಪಿಸಿಕೊಂಡ ಡೇವಿಡ್, “ಬೆಂಗಳೂರಿನಲ್ಲಿರುವುದು ನಮಗೆ ಸದಾ ಖುಷಿ ನೀಡುತ್ತದೆ. ಅಲ್ಲಿನ ಹೋಟೆಲ್ ಸಿಬ್ಬಂದಿ ಮತ್ತು ಜನರೊಂದಿಗೆ ನಮಗೆ ಉತ್ತಮ ಒಡನಾಟ ಬೆಳೆದಿತ್ತು. ಮುಖ್ಯವಾಗಿ ಆರ್ಸಿಬಿ ಅಭಿಮಾನಿಗಳ ಶಕ್ತಿ ಅಪಾರವಾದುದು. ಒಂದು ಸೀಸನ್ ನಂತರ ನಿಮ್ಮನ್ನು ಭೇಟಿಯಾಗಿದ್ದು ಸಂತೋಷ ತಂದಿದೆ. ನೀವು ತೋರಿಸುವ ಅದೇ ಸ್ಪೂರ್ತಿ ನಮ್ಮನ್ನು ಮೈದಾನದಲ್ಲಿ ಹುರಿದುಂಬಿಸುತ್ತದೆ,” ಎಂದು ಅಭಿಮಾನಿಗಳಿಗೆ ಧನ್ಯವಾದ ಅರ್ಪಿಸಿದರು.
ಅಜೇಯ ದಾಖಲೆ ಉಳಿಸಿಕೊಳ್ಳುವ ಸವಾಲು
ಕಳೆದ ವರ್ಷ ಆರ್ಸಿಬಿ ತಂಡವು ಹೊರಗಿನ (Away) ಪಂದ್ಯಗಳಲ್ಲಿ ಒಂದೂ ಸೋಲನ್ನೇ ಕಂಡಿರಲಿಲ್ಲ. ಈ ಅಜೇಯ ದಾಖಲೆಯನ್ನು ಈ ಬಾರಿಯೂ ಮುಂದುವರಿಸುವ ಒತ್ತಡ ತಂಡದ ಮೇಲಿದೆ. “ನಾವು ಈ ವರ್ಷವನ್ನು ಗೆಲುವಿನೊಂದಿಗೆ ಆರಂಭಿಸಿದ್ದೇವೆ ಎಂಬುದು ನಿಜ. ಆದರೆ ಈಗ ಒತ್ತಡ ಹೆಚ್ಚಿದೆ. ಕಳೆದ ವರ್ಷದ ಹೊರಗಿನ ಪಂದ್ಯಗಳ ದಾಖಲೆಯನ್ನು ಕಾಪಾಡಿಕೊಳ್ಳಬೇಕಿದೆ. ಗುವಾಹಟಿ ಒಂದು ಸುಂದರ ನಗರ, ಅಲ್ಲಿನ ಸವಾಲುಗಳನ್ನು ಎದುರಿಸಲು ನಾವು ಸಿದ್ಧರಿದ್ದೇವೆ,” ಎಂದು ಡೇವಿಡ್ ವಿಶ್ವಾಸ ವ್ಯಕ್ತಪಡಿಸಿದರು.
ರಾಜಸ್ಥಾನ ರಾಯಲ್ಸ್ ಸದ್ಯ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದು, ಆರ್ಸಿಬಿ ತನ್ನ ಮೂರನೇ ಜಯದ ಹುಡುಕಾಟದಲ್ಲಿದೆ. ಗುವಾಹಟಿಯ ಎಸಿಎ ಕ್ರೀಡಾಂಗಣದಲ್ಲಿ ನಡೆಯಲಿರುವ ಈ ಪಂದ್ಯವು ಟಿಮ್ ಡೇವಿಡ್ ಅವರಂತಹ ಫಿನಿಶರ್ಗಳಿಗೆ ಮಹತ್ವದ್ದಾಗಿದೆ. ಬೆಂಗಳೂರಿನ ಬ್ಯಾಟಿಂಗ್ ಲೈನಪ್ ಮತ್ತು ರಾಜಸ್ಥಾನದ ಬೌಲಿಂಗ್ ನಡುವಿನ ಈ ಕಾದಾಟವು ಅಭಿಮಾನಿಗಳಿಗೆ ಭರ್ಜರಿ ರಸದೌತಣ ನೀಡಲಿದೆ.
