ವಾಷಿಂಗ್ಟನ್, ಡಿ.ಸಿ. : ಹಾರ್ಮುಜ್ ಜಲಸಂಧಿಯಲ್ಲಿ (Strait of Hormuz) ಬೆದರಿಕೆ ಹಾಕುವ ಮೂಲಕ ಜಾಗತಿಕ ಕಚ್ಚಾ ತೈಲ ಬೆಲೆಗಳ ಮೇಲೆ ಪ್ರಭಾವ ಬೀರಲು ಇರಾನ್ ಪ್ರಯತ್ನಿಸುತ್ತಿದೆ. ಅಮೆರಿಕದ ಎದುರು ತನ್ನ ಮಿಲಿಟರಿ ಅಸಮತೋಲನವನ್ನು ಸರಿಪಡಿಸಲು ಇದು ಇರಾನ್ನ ಪಾಲಿಗೆ “ತಾರ್ಕಿಕ ಪ್ರತಿಕ್ರಿಯೆ” ಇರಬಹುದು. ಆದರೆ, ವಾಷಿಂಗ್ಟನ್ ಮತ್ತು ಅದರ ಮಿತ್ರರಾಷ್ಟ್ರಗಳು ಈ ಜಲಮಾರ್ಗವನ್ನು ರಕ್ಷಿಸಲು ಮುಂದಾದರೆ, ಇರಾನ್ನ ಈ ನಡೆ ಅದರ ವಿರುದ್ಧವೇ ತಿರುಗುಬಾಣವಾಗುವ ಅಪಾಯವಿದೆ ಎಂದು ಅಮೆರಿಕದ ರಿಪಬ್ಲಿಕನ್ ಸ್ಟ್ರಾಟಜಿಸ್ಟ್ ಮತ್ತು ವಾಯುಪಡೆಯ ನಿವೃತ್ತ ಅಧಿಕಾರಿ ಎಲಿ ಬ್ರೆಮರ್ ಹೇಳಿದ್ದಾರೆ.
“ಒಂದು ವೇಳೆ ಡೊನಾಲ್ಡ್ ಟ್ರಂಪ್ ಅವರು ಅಮೆರಿಕದ ಜೊತೆಗೆ ಇತರ ಹಲವಾರು ರಾಷ್ಟ್ರಗಳನ್ನು ಒಗ್ಗೂಡಿಸಿ ನೌಕಾಪಡೆಯ ಮೂಲಕ ಈ ಪ್ರದೇಶದಲ್ಲಿ ಕಾವಲು ಕಾಯಲು ಮುಂದಾದರೆ, ಇರಾನ್ಗೆ ಅದು ದೊಡ್ಡ ಅಪಾಯವಾಗಲಿದೆ” ಎಂದು ಬ್ರೆಮರ್ ತಿಳಿಸಿದ್ದಾರೆ. ಈ ಪರಿಸ್ಥಿತಿಯು ಇರಾನ್ ಅತ್ಯಂತ ಕಠಿಣ ನಿರ್ಧಾರವನ್ನು ತೆಗೆದುಕೊಳ್ಳುವಂತೆ ಒತ್ತಡ ಹೇರಲಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಯುದ್ಧದ ಆರಂಭದಲ್ಲೇ ತನ್ನ ನೆರೆಯ ರಾಷ್ಟ್ರಗಳ ಮೇಲೆ ಗುಂಡಿನ ದಾಳಿ ನಡೆಸುವ ಮೂಲಕ ಇರಾನ್ ಈಗಾಗಲೇ ಸಾಕಷ್ಟು ಶತ್ರುಗಳನ್ನು ಕಟ್ಟಿಕೊಂಡಿದೆ. ಒಂದು ವೇಳೆ ಅಮೆರಿಕವನ್ನು ಹೊರತುಪಡಿಸಿ, ಹಡಗುಗಳಿಗೆ ರಕ್ಷಣೆ ನೀಡುತ್ತಿರುವ ಇತರ ದೇಶಗಳ ಯುದ್ಧನೌಕೆಗಳ ಮೇಲೆ ಇರಾನ್ ದಾಳಿ ನಡೆಸಿದರೆ, ಕಚ್ಚಾ ತೈಲ ಬೆಲೆಗಳ ಏರಿಕೆಯ ಲಾಭದ ನಡುವೆಯೂ ಇರಾನ್ ಜಾಗತಿಕವಾಗಿ “ಪರಯ್ಯಾ” (ಅಸ್ಪೃಶ್ಯ ಅಥವಾ ಬಹಿಷ್ಕೃತ ದೇಶ) ಆಗುವ ಅಪಾಯವಿದೆ ಎಂದು ಎಚ್ಚರಿಸಿದ್ದಾರೆ.
