2023–24 ರಲ್ಲಿ ಬಿಜೆಪಿ ಆದಾಯ ರೂ. 4,340 ಕೋಟಿ; ಎರಡನೇ ಸ್ಥಾನದಲ್ಲಿ ಕಾಂಗ್ರೆಸ್‌

Most read

ನವದೆಹಲಿ: 2023–24ನೇ ಹಣಕಾಸು ವರ್ಷದಲ್ಲಿ ಆರು ರಾಷ್ಟ್ರೀಯ ಪಕ್ಷಗಳು ಒಟ್ಟು ರೂ.5,820 ಕೋಟಿ ಆದಾಯ ಗಳಿಸಿವೆ. ಈ ಪೈಕಿ ಬಿಜೆಪಿಯ ಆದಾಯವು ಒಟ್ಟು ರೂ. 4,340 ಕೋಟಿಗಳಷ್ಟಿದೆ. ಅಂದರೆ ಆರು ರಾಷ್ಟ್ರೀಯ ಪಕ್ಷಗಳ ಒಟ್ಟು ಆದಾಯದ ಶೇ. 75 ರಷ್ಟಿದೆ ಎಂದು ಅಸೋಸಿಯೇಷನ್‌ ಫಾರ್‌ ಡೆಮಾಕ್ರಟಿಕ್‌ ರಿಫಾರ್ಮ್ಸ್‌ (ಎಡಿಆರ್‌) ಸಂಸ್ಥೆಯ ವರದಿ ತಿಳಿಸಿದೆ. 2022–23ನೇ ಹಣಕಾಸು ವರ್ಷದಲ್ಲಿ ಆರು ರಾಷ್ಟ್ರೀಯ ಪಕ್ಷಗಳು ಒಟ್ಟು ರೂ. 3,077 ಕೋಟಿ ಆದಾಯ ಗಳಿಸಿರುವುದಾಗಿ ಘೋಷಿಸಿಕೊಂಡಿದ್ದವು. ಈ ಪೈಕಿ ಬಿಜೆಪಿಯ ಆದಾಯವು ಒಟ್ಟು ರೂ. 2,361 ಕೋಟಿಯಷ್ಟಿತ್ತು. ಆದರೆ, ಈ ಬಾರಿ ಬಿಜೆಪಿಯ ಆದಾಯವು ಶೇ. 83.85ರಷ್ಟು ಹೆಚ್ಚಾಗಿದೆ ಎಂದು ಎಡಿಆರ್‌ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಅತಿ ಹೆಚ್ಚು ಆದಾಯ ಇರುವ ಎರಡನೇ ಪಕ್ಷ ಕಾಂಗ್ರೆಸ್. ಕಾಂಗ್ರೆಸ್‌  2023–24ನೇ ಹಣಕಾಸು ವರ್ಷದಲ್ಲಿ ರೂ.1,225 ಕೋಟಿ ಆದಾಯ ಗಳಿಸಿದ್ದರೆ 2022-23ನೇ ಸಾಲಿನಲ್ಲಿ ರೂ. 772.74 ಕೋಟಿ ಗಳಿಸಿತ್ತು. ಈ ಬಾರಿ ಸಿಪಿಐ(ಎಂ) ರೂ.167.63 ಕೋಟಿ ಆದಾಯ ಘೋಷಿಸಿದ್ದು, ಬಿಎಸ್‌ಪಿ ರೂ.64.77 ಕೋಟಿ, ಎಎಪಿ ರೂ.22.68 ಕೋಟಿ ಮತ್ತು ನ್ಯಾಷನಲ್‌ ಪೀಪಲ್ಸ್‌ ಪಾರ್ಟಿ (ಎನ್‌‍ಪಿಪಿ) ರೂ.22.44 ಲಕ್ಷ ಆದಾಯ ಗಳಿಸಿದೆ.

ಸ್ವಯಂಪ್ರೇರಿತ ಕೊಡುಗೆಯಾಗಿ ಬಿಜೆಪಿ ರೂ.3,967.14 ಕೋಟಿ, ಕಾಂಗ್ರೆಸ್ ರೂ.11,129 ಕೋಟಿ, ಸಿಪಿಐ(ಎಂ) ರೂ.74.86 ಕೋಟಿ, ಎಎಪಿ ರೂ.22.13 ಕೋಟಿ ಮತ್ತು ಎನ್‌ಪಿಪಿ ರೂ.17.69 ಲಕ್ಷ ಗಳಿಸಿದೆ. ಇದರಲ್ಲಿ ಬಿಜೆಪಿ ರೂ.1,685.62 ಕೋಟಿ ಅಥವಾ ಒಟ್ಟು ಆದಾಯದ ಶೇ 38.84ರಷ್ಟು ಚುನಾವಣಾ ಬಾಂಡ್‌ಗಳ ಮೂಲಕ ಪಡೆದರೆ, ಕಾಂಗ್ರೆಸ್ ರೂ.828.36 ಕೋಟಿ (ಶೇ. 67.61) ಗಳಿಸಿದೆ. ಎಎಪಿ ಚುನಾವಣಾ ಬಾಂಡ್‌ಗಳ ಮೂಲಕ ರೂ.10.15 ಕೋಟಿ ಪಡೆದಿರುವುದಾಗಿ ಘೋಷಿಸಿದೆ. ಉಳಿದಂತೆ ಸಿಪಿಐ(ಎಂ), ಬಿಎಸ್‌ಪಿ ಮತ್ತು ಎನ್‌ಸಿಪಿ ಚುನಾವಣಾ ಬಾಂಡ್‌ಗಳ ಮೂಲಕ ಯಾವುದೇ ಹಣ ಸ್ವೀಕರಿಸಿಲ್ಲ.

ಬಿಜೆಪಿಯ ಮತ್ತೊಂದು ಪ್ರಮುಖ ಆದಾಯದ ಮೂಲವೆಂದರೆ ಠೇವಣಿಗಳ ಮೇಲಿನ ಬಡ್ಡಿ ರೂ.369 ಕೋಟಿಗಳಷ್ಟಿದ್ದರೆ, ಕೂಪನ್‌ಗಳನ್ನು ನೀಡುವ ಮೂಲಕ ಕಾಂಗ್ರೆಸ್ ರೂ.58.55 ಕೋಟಿ ಸಂಗ್ರಹಿಸಿದೆ. ಪಕ್ಷದ ಚಂದಾದಾರಿಕೆಯ ಮೂಲಕ ಸಿಪಿಐ(ಎಂ) ರೂ.49.08 ಕೋಟಿ ಗಳಿಸಿದ್ದರೆ, ಬಿಎಸ್‌ಪಿ ಬ್ಯಾಂಕ್ ಬಡ್ಡಿ ಮೂಲಕ ರೂ.38.18 ಕೋಟಿ ಗಳಿಸಿದೆ. ಬಿಜೆಪಿ, ಕಾಂಗ್ರೆಸ್ ಮತ್ತು ಸಿಪಿಐ(ಎಂ) ಆದಾಯದಲ್ಲಿ ಹೆಚ್ಚಳ ಕಂಡರೆ, ಎಎಪಿ, ಎನ್‌ಪಿಪಿ ಮತ್ತು ಬಿಎಸ್‌ಪಿ ಕೂಡ 2022-23ಕ್ಕೆ ಹೋಲಿಸಿದರೆ ಆದಾಯದಲ್ಲಿ ಕುಸಿತ ದಾಖಲಿಸಿವೆ.

More articles

Latest article