ಲಂಡನ್: ವಿಶ್ವದಲ್ಲಿ 40 ಲಕ್ಷಕ್ಕೂ ಹೆಚ್ಚು ಎಚ್‌ಐವಿ ಸೋಂಕಿತರಿದ್ದು, ಕಳೆದ ವರ್ಷ ಏಡ್ಸ್‌ ನಿಂದ 6.30 ಲಕ್ಷ ಸಾವು ಸಂಭವಿಸಿವೆ ಎಂದು ವಿಶ್ವಸಂಸ್ಥೆ ತಿಳಿಸಿದೆ. ಐರೋಪ್ಯ ಔಷಧಗಳ ನಿಯಂತ್ರಕ ಸಂಸ್ಥೆಯು ಎಚ್‌ ಐ ವಿ ಸೋಂಕನ್ನು ನಿಯಂತ್ರಿಸುವ, ವರ್ಷಕ್ಕೆ ಎರಡು ಬಾರಿ ನೀಡುವ ಲೆನಾಕಾಪವಿರ್ ಲಸಿಕೆಯನ್ನು ಶಿಫಾರಸು ಮಾಡಿದೆ. ಲಸಿಕೆಯು ಎಚ್‌ ಐವಿ ಹರಡುವಿಕೆಗೆ ಕೊನೆ ಹಾಡಲಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಗಿಲಾಡ್ ಸೈನ್ಸಸ್‌ ಸಂಸ್ಥೆಯು ಯೂರೋಪ್‌ನಲ್ಲಿ ಲೆನಾಕಾಪವಿರ್ ಔಷಧಿಯನ್ನು ಪರೀಕ್ಷೆಗೊಳಪಡಿಸಿದ್ದು, ಇದು ಅತ್ಯಂತ ಪರಿಣಾಮಕಾರಿ ಮತ್ತು ಸಾರ್ವಜನಿಕ ಆರೋಗ್ಯದ ಹಿತಕ್ಕೆ ಅಗತ್ಯ ಎಂದು ಐರೋಪ್ಯ ಔಷಧ ನಿಯಂತ್ರಕ ಸಂಸ್ಥೆ ತಿಳಿಸಿದೆ. ಕಳೆದ ವರ್ಷ ಎಚ್‌ಐವಿ ಬಾಧಿತರಿಗೆ ಲೆನಾಕಾಪವಿರ್ ಲಸಿಕೆ ನೀಡಿದ್ದು ಮಹಿಳೆ ಮತ್ತು ಪುರುಷ ಇಬ್ಬರಲ್ಲೂ ಸೋಂಕಿನ ಹರಡುವಿಕೆ ನಿಯಂತ್ರಿಸುವಲ್ಲಿ ಶೇ. 100ರಷ್ಟು ಪರಿಣಾಮ ತೋರಿಸಿದೆ ಎಂದು ಅಧ್ಯಯನ ತಿಳಿಸಿದೆ. ಐರೋಪ್ಯ ಆಯೋಗದಿಂದ ಔಷಧಿಗೆ ಒಪ್ಪಿಗೆ ದೊರೆತಿದ್ದು, ಐರೋಪ್ಯ ಒಕ್ಕೂಟದ 27 ಸದಸ್ಯ ರಾಷ್ಟ್ರಗಳು ಮತ್ತು ಐಸ್‌ಲ್ಯಾಂಡ್‌, ನಾರ್ವೆ, ಲಿಕಟೆಸ್ಟಾಯಿನ್ ದೇಶಗಳಲ್ಲಿ ಮಾನ್ಯತೆ ಸಿಕ್ಕಿದೆ.
ಕಳೆದ ವರ್ಷವೇ ವಿಶ್ವ ಆರೋಗ್ಯ ಸಂಸ್ಥೆ ಈ ಔಷಧಿಯನ್ನು ಶಿಫಾರಸು ಮಾಡಿದೆ. ವಿಶ್ವ ಸಂಸ್ಥೆಯ ಏಡ್ಸ್‌ ಏಜೆನ್ಸಿ ಕಾರ್ಯಕಾರಿ ನಿರ್ದೇಶಕ ವಿನ್ನೇ ಬ್ಯಾನ್ಯಿಮಾ ಅವರು ಈ ಔಷಧಿ ಅಗತ್ಯವಿದ್ದವರಿಗೆ ಲಭ್ಯವಾದಲ್ಲಿ ಎಚ್‌ಐವಿ ಸಾಂಕ್ರಾಮಿಕ ರೋಗ ಗಣನೀಯವಾಗಿ ಕಡಿಮೆಯಾಗಲಿದೆ ಎಂದಿದ್ದಾರೆ.
ಲೆನಾಕಾಪವಿರ್ ಸೋಂಕಿನಿಂದ ಆರು ತಿಂಗಳವರೆಗೆ ರಕ್ಷಣೆ ನೀಡಲಿದೆ. ಇದು ಈವರೆಗಿನ ಸುದೀರ್ಘ ರಕ್ಷಣೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ. ಆದರೆ ಇಡೀ ಜಗತ್ತಿನ ಎಚ್‌ಐವಿ ನಿಯಂತ್ರಣಕ್ಕೆ ಅಗತ್ಯ ಇರುವಷ್ಟು ಪ್ರಮಾಣದಲ್ಲಿ ಲೆನಾಕಾಪವಿರ್ ಲಭ್ಯತೆ ಕಷ್ಟಸಾಧ್ಯ ಎಂದೂ ತಿಳಿದು ಬಂದಿದೆ.
ಇದು ಅಗ್ಗದ ಔಷಧಿಯಾಗಿದ್ದು, ಆಫ್ರಿಕಾ, ಆಗ್ನೇಯ ಏಷ್ಯಾ ಮತ್ತು ಕೆರಿಬಿಯನ್‌ ನ 120 ಬಡ ರಾಷ್ಟ್ರಗಳಿಗೆ ಪೂರೈಸಲು ಸಾಧ್ಯವಿದೆ ಎಂದು ಔಷಧ ತಯಾರಕ ಸಂಸ್ಥೆ ಗಿಲಾಡ್ ತಿಳಿಸಿದೆ.
