ಬೆಂಗಳೂರು: ದಿ ವೈರ್‌ ಡಿಜಿಟಲ್‌ ಸುದ್ದಿ ಮಾಧ್ಯಮವನ್ನು ಕೇಂದ್ರ ಸರ್ಕಾರ ನಿಷೇಧಿಸಿದೆ. ಸಂವಿಧಾನ ನೀಡಿರುವ ಮಾಧ್ಯಮ ಸ್ವಾತಂತ್ರ್ಯವನ್ನು ಉಲ್ಲಂಘಿಸಿ ದೇಶಾದ್ಯಂತ ದಿ ವೈರ್‌ ಮಾಧ್ಯಮವನ್ನು ಕೇಂದ್ರ ಸರ್ಕಾರ ನಿಷೇಧಿಸಿದೆ. ಐಟಿ ಕಾಯಿದೆ-2000 ದ ಪ್ರಕಾರ ಎಲೆಕ್ಟ್ರಾನಿಕ್ಸ್‌ ಮತ್ತು ಮಾಹಿತಿ ತಂತ್ರಜ್ಞಾನ ಕಾಯಿದೆ ಪ್ರಕಾರ ದಿ ವೈರ್‌ ಅನ್ನು ಬ್ಲಾಕ್‌ ಮಾಡಲಾಗಿದೆ ಎಂದು ಇಂಟರ್‌ ನೆಟ್‌ ಸೇವಾ ಪೂರೈಕೆದಾರರು ತಿಳಿಸಿದ್ದಾರೆ.
ಸರ್ಕಾರದ ಈ ಕ್ರಮವನ್ನು ಉಗ್ರವಾಗಿ ಖಂಡಿಸುತ್ತೇವೆ. ಮಾಧ್ಯಮದ ಪ್ರಮುಖ ಆಸ್ತಿಯಾದ ಸತ್ಯ, ನ್ಯಾಯ ನಿಷ್ಠುರವನ್ನು ಬಿತ್ತರಿಸುವ ಮಾಧ್ಯಮಗಳ ತುರ್ತು ಅವಶ್ಯಕತೆ ಇರುವ ಸಂದರ್ಭದಲ್ಲಿ ಸರ್ಕಾರದ ಈ ಕ್ರಮ ಖಂಡನೀಯ. ಸರ್ಕಾರದ ಈ ಅನಪೇಕ್ಷಿತ ನಡೆಯನ್ನು ಸೂಕ್ತ ವೇದಿಕೆಯಲ್ಲಿ ಪ್ರಶ್ನಿಸುತ್ತೇವೆ. ನಮ್ಮ ಓದುಗರಿಗೆ ಸತ್ಯ, ನಿಖರ ಸುದ್ದಿಯನ್ನು ನೀಡುವ ಪ್ರಯತ್ನದಿಂದ ಯಾವುದೇ ಕಾರಣಕ್ಕೂ ಹಿಂದೆ ಸರಿಯುವುದಿಲ್ಲ ಎಂದು ದಿ ವೈರ್‌ ಮಾಧ್ಯಮ ಸಂಸ್ಥೆ ಪ್ರಕಟಣೆಯಲ್ಲಿ ತಿಳಿಸಿದೆ.
