ಡ್ರಗ್ಸ್ ಮಾರಾಟ ಆರೋಪ ಸಾಬೀತು: ಮೂವರಿಗೆ 14 ವರ್ಷ ಜೈಲು

Most read

ಬೆಂಗಳೂರು: ಡ್ರಗ್ಸ್ ಮಾರಾಟ ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ಮೂವರು ಅಪರಾಧಿಗಳಿಗೆ 14 ವರ್ಷ ಜೈಲು ಶಿಕ್ಷೆ ಮತ್ತು 1.5 ಲಕ್ಷ ರೂಪಾಯಿ ದಂಡ ವಿಧಿಸಿ 33 ನೇ ಸಿಸಿಎಚ್ ನ್ಯಾಯಾಲಯ ಆದೇಶ ಹೊರಡಿಸಿದೆ. ನ್ಯಾಯಾಧೀಶರಾದ ವಿಜಯ ದೇವರಾಜ್ ಅರಸು ತೀರ್ಪು ನೀಡಿದ್ದಾರೆ.

ಜೆ. ಜೆ ನಗರ ನಿವಾಸಿಗಳಾದ ಸೈಯದ್ ಯಾರಬ್, ಶಾಬಾಜ್ ಖಾನ್, ಇಮ್ರಾನ್ ಪಾಷಾ ಶಿಕ್ಷೆಗೊಳಗಾದ ಆರೋಪಿಗಳು. ಮತ್ತೊಬ್ಬ ಆರೋಪಿಯ ವಿರುದ್ಧ ಸಾಕ್ಷ್ಯಾಧಾರಗಳು ಸಿಗದ ಕಾರಣ ಅವರನ್ನು ಖುಲಾಸೆಗೊಳಿಸಲಾಗಿದೆ. ಗುಡ್ಡದಹಳ್ಳಿ ಮುಖ್ಯರಸ್ತೆಯ ಈದ್ದಾ ಮೈದಾನದ ಬಳಿ 2023 ಜ.ರಂದು ಸಿಸಿಬಿ ಸಂಘಟಿತ ಅಪರಾಧ ದಳದ ಇನ್‌ಸ್ಪೆಕ್ಟರ್ ಎಸ್‌.ಮಹದೇವಸ್ವಾಮಿ ನೇತೃತ್ವದ ಆರೋಪಿಗಳನ್ನು ಬಂಧಿಸಿತ್ತು.

ಸೈಯದ್, ಶಾಬಾಜ್, ಇಮ್ರಾನ್ ಬಳಿ ಮಾರಾಟಕ್ಕೆ ತಂದಿದ್ದ 1 ಕೆ.ಜಿ. ಗಾಂಜಾ, 22 ಎಲ್‌ಎಸ್‌ಡಿ ಸ್ಟ್ರಿಪ್ಸ್, 25 ಗ್ರಾಂ ಮೆಥಾಮಫೆಟಮಿನ್‌ ಪತ್ತೆಯಾಗಿತ್ತು. ಆರೋಪಿಗಳು ಡ್ರಗ್ಸ್ ಮಾರಾಟ ದಂಧೆಯಲ್ಲಿ ಭಾಗಿಯಾಗಿರುವ ಬಗ್ಗೆ ಸಾಕ್ಷ್ಯಾಧಾರ ಸಹಿತ ಎನ್‌ ಡಿಪಿಎಸ್ ಕಾಯಿದೆ ಅನ್ವಯ ನ್ಯಾಯಾಲಯಕ್ಕೆ ಆರೋಪ ಪಟ್ಟಿ ಸಲ್ಲಿಸಲಾಗಿತ್ತು. ಆರೋಪ ಸಾಬೀತಾದ ಕಾರಣ ಶಿಕ್ಷೆ ವಿಧಿಸಲಾಗಿದೆ.

More articles

Latest article