ಕಾಮನ್‌ವೆಲ್ತ್‌ ಪ್ಯಾರಾ ಕ್ರೀಡಾಕೂಟದಲ್ಲಿ ಮೈಸೂರಿನ ಶಿಲ್ಪಾಗೆ ಕಂಚಿನ ಪದಕ

ಗ್ಲ್ಯಾಸ್ಗೋ: ಅಧಿಕೃತ ಪರಿಶೀಲನೆಯ ನಂತರ ನೈಜೀರಿಯಾದ ಯುಚೇರಿಯಾ ಇಯಿಯಾಜಿ ಅನರ್ಹಗೊಂಡಿದ್ದರಿಂದ, 2026ರ ಕಾಮನ್‌ವೆಲ್ತ್ ಕ್ರೀಡಾಕೂಟದ ಮಹಿಳೆಯರ ಶಾಟ್ ಪುಟ್ F57 ವಿಭಾಗದಲ್ಲಿ ಭಾರತದ ಪ್ಯಾರಾ-ಅಥ್ಲೀಟ್ ಮೈಸೂರಿನ ಶಿಲ್ಪಾ ಶೈಲಾ ಅವರಿಗೆ ಕಂಚಿನ ಪದಕ ಲಭಿಸಿದೆ. ಇದರೊಂದಿಗೆ ಗ್ಲ್ಯಾಸ್ಗೋ ಕ್ರೀಡಾಕೂಟದಲ್ಲಿ ಭಾರತವು ಮೊದಲ ಬಾರಿಗೆ ಒಂದೇ ಸ್ಪರ್ಧೆಯಲ್ಲಿ ಇಬ್ಬರು ಕ್ರೀಡಾಪಟುಗಳು ಪದಕ ಪಡೆದು ಸಾಧನೆ ಮಾಡಿದ್ದಾರೆ.

ಶಿಲ್ಪಾ ಆರಂಭದಲ್ಲಿ 7.26 ಮೀಟರ್‌ಗಳ ವೈಯಕ್ತಿಕ ಅತ್ಯುತ್ತಮ ಸಾಧನೆಯೊಂದಿಗೆ ನಾಲ್ಕನೇ ಸ್ಥಾನದಲ್ಲಿದ್ದರು. ಆದರೆ ಐಯಾಜಿ ಅವರ ಫಲಿತಾಂಶವನ್ನು ರದ್ದುಗೊಳಿಸಿದ ನಂತರ ಅವರು ಪದಕ ಪಟ್ಟಿಗೆ ಏರಿದರು. ಪರಿಷ್ಕೃತ ಫಲಿತಾಂಶಗಳ ಪಟ್ಟಿಯಲ್ಲಿ, ಮತ್ತೊಬ್ಬ ಭಾರತೀಯ ಸ್ಪರ್ಧಿ ಶರ್ಮಿಳಾ ಧಂಕರ್ 9.81 ಮೀಟರ್‌ಗಳ ‘ಸೀಸನ್-ಬೆಸ್ಟ್’ ಸಾಧನೆಯೊಂದಿಗೆ ಚಿನ್ನದ ಪದಕವನ್ನು ಉಳಿಸಿಕೊಂಡರೆ, ಘಾನಾದ ಜಿನಾಬು ಇಸ್ಸಾ 8.65 ಮೀಟರ್‌ಗಳೊಂದಿಗೆ ಬೆಳ್ಳಿ ಪದಕವನ್ನು ಪಡೆದರು.

ಈ ಉನ್ನತೀಕರಿಸಲ್ಪಟ್ಟ ಕಂಚಿನ ಪದಕದೊಂದಿಗೆ, ಈ ಕ್ರೀಡಾಕೂಟದಲ್ಲಿ ಭಾರತದ ಒಟ್ಟು ಪದಕಗಳ ಸಂಖ್ಯೆ 10ಕ್ಕೇರಿದೆ (ಎರಡು ಚಿನ್ನ, ಐದು ಬೆಳ್ಳಿ ಮತ್ತು ಮೂರು ಕಂಚಿನ ಪದಕಗಳು). ಶಿಲ್ಪಾ ಅವರ ಈ ಪದಕವು ಕರ್ನಾಟಕದ ಈ ಪ್ಯಾರಾ-ಕ್ರೀಡಾಪಟುವಿಗೆ ಒಂದು ಮಹತ್ವದ ವೈಯಕ್ತಿಕ ಮೈಲಿಗಲ್ಲಾಗಿದೆ. ಕಾಮನ್‌ವೆಲ್ತ್ ವೇದಿಕೆಯನ್ನು ತಲುಪುವ ಅವರ ಈ ಪಯಣವು ದೃಢತೆ ಮತ್ತು ಪರಿಶ್ರಮದಿಂದ ರೂಪುಗೊಂಡಿತ್ತು.

ಮೈಸೂರು ಜಿಲ್ಲೆಯ ಕೆ.ಆರ್‌,ನಗರದ ಕಂಚಿಗಾರ ಕೊಪ್ಪಲು ಗ್ರಾಮದಲ್ಲಿ ಜನಿಸಿದ ಶಿಲ್ಪಾ, ತಮ್ಮ ನಾಲ್ಕನೇ ವಯಸ್ಸಿನಲ್ಲಿ ವೇಗವಾಗಿ ಬಂದ ಟ್ರಕ್ ಡಿಕ್ಕಿ ಹೊಡೆದ ಪರಿಣಾಮ ಎಡಗಾಲನ್ನು ಕಳೆದುಕೊಂಡರು. ಜೀವನವನ್ನೇ ಬದಲಿಸಿದ ಆ ಅಪಘಾತದ ಹೊರತಾಗಿಯೂ, ಅವರು ತಮ್ಮ ಶಿಕ್ಷಣವನ್ನು ಮುಂದುವರಿಸಿ ಸ್ನಾತಕೋತ್ತರ ಪದವಿ ಹಾಗೂ ಬಿ.ಇಡಿ. ಪೂರೈಸಿದರು. ಪ್ಯಾರಾ-ಅಥ್ಲೆಟಿಕ್ಸ್‌ನಲ್ಲಿ ತೊಡಗಿಸಿಕೊಳ್ಳುವ ಮೊದಲು ಅವರು ಆರಂಭದಲ್ಲಿ ಶಾಲಾ ಶಿಕ್ಷಕಿಯಾಗಿ ಕೆಲಸ ಮಾಡಿದರು. ಬಡ ಕುಟುಂಬದ ರೈತರ ಮಗಳಾಗಿದ್ದಾರೆ.
ಪದಕ ಗಳಿಸಿದ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ತುಂಬಾ ಖುಷಿಯಾಗುತ್ತಿದೆ. ನನಗೆ ಸಹಾಯ ಮಾಡಿದ ಎಲ್ಲರಿಗೂ ಧನ್ಯವಾದ ಎಂದು ತಿಳಿಸಿದ್ದಾರೆ.