ನವದೆಹಲಿ: ಉತ್ಪಾದನೆಯಲ್ಲಿ ಸ್ವಾವಲಂಬನೆ ಸಾಧಿಸುವವರೆಗೂ, ಉದ್ಯೋಗದ ಬಗ್ಗೆ ಮಾತನಾಡುವುದು, ಅಭಿವೃದ್ಧಿ, ಮೇಕ್ ಇನ್ ಇಂಡಿಯಾಗೆ ಅರ್ಥವಿಲ್ಲ ಎಂದು ಕಾಂಗ್ರೆಸ್ ಮುಖಂಡ ಲೋಕಸಭೆ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಹೇಳಿದ್ದಾರೆ. ಈ ಮೂಲಕ ಪ್ರಧಾನಿ ನರೇಂದ್ರ ಮೋದಿ ಸರ್ಕಾರದ ‘ಮೇಕ್ ಇನ್ ಇಂಡಿಯಾ’ ಯೋಜನೆಯನ್ನು ಕಟುವಾಗಿ ಟೀಕಿಸಿದ್ದಾರೆ.
ಗ್ರೇಟರ್ ನೋಯ್ಡಾದಲ್ಲಿ ಟಿವಿಗಳನ್ನು ಜೋಡಿಸುವ ಸ್ಥಳೀಯ ಘಟಕಕ್ಕೆ ಭೇಟಿ ನೀಡಿದ್ದ ವಿಡಿಯೊವನ್ನು ಹಂಚಿಕೊಂಡು ರಾಹುಲ್ ಅವರು ಈ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ.
ಈ ಯೋಜನೆಯಡಿ ಕೇವಲ ಜೋಡಿಸುವ ಕೆಲಸ ನಡೆಯುತ್ತಿದೆ, ಉತ್ಪಾದನೆ ನಡೆಯುತ್ತಿಲ್ಲ. ಜೋಡಣಾ ವಲಯದಿಂದ ಹೊರಬರಬೇಕಿದ್ದರೆ ಅಮೂಲಾಗ್ರ ಬದಲಾವಣೆ ಬೇಕಿದೆ ಎಂದು ಅವರು ಹೇಳಿದ್ದಾರೆ.
ಎಕ್ಸ್‌ ಮೂಲಕ ತಮ್ಮ ಅಭಿಪ್ರೈ ಹಂಚಿಕೋಮಡಿರುವ ಅವರು ಭಾರತವು ಜೋಡಣಾ ವಲಯವನ್ನು ಮೀರಿ ನಿಜವಾದ ಉತ್ಪಾದನಾ ಶಕ್ತಿಯಾಗಲು, ಚೀನಾದೊಂದಿಗೆ ಸಮಾನವಾಗಿ ಸ್ಪರ್ಧಿಸಲು ಅಮೂಲಾಗ್ರ ಬದಲಾವಣೆಯ ಅಗತ್ಯವಿದೆ. ಭಾರತದಲ್ಲಿ ತಯಾರಾಗುವ ಹೆಚ್ಚಿನ ಟಿವಿಗಳ ಶೇ. 80 ಬಿಡಿಭಾಗಗಳು ಚೀನಾದಿಂದ ಆಮದಾಗುತ್ತವೆ. ‘ಮೇಕ್ ಇನ್ ಇಂಡಿಯಾ’ ಹೆಸರಿನಲ್ಲಿ, ನಾವು ಕೇವಲ ಜೋಡಣೆ ಮಾಡುತ್ತಿದ್ದೇವೆ, ಉತ್ಪಾದನೆ ಮಾಡುತ್ತಿಲ್ಲ. ಐಫೋನ್‌ ಗಳಿಂದ ಟಿವಿಗಳವರೆಗೆ, ಬಿಡಿಭಾಗಗಳು ವಿದೇಶದಿಂದ ಬರುತ್ತವೆ. ನಾವು ಅವುಗಳನ್ನು ಜೋಡಿಸುತ್ತೇವೆ ಅಷ್ಟೇ ಎಂದು ರಾಹುಲ್ ತಿಳಿಸಿದ್ದಾರೆ.
ಸಣ್ಣ ಉದ್ಯಮಿಗಳು ಉತ್ಪಾದಿಸಲು ಬಯಸುತ್ತಾರೆ. ಆದರೆ ಅದಕ್ಕೆ ಬೇಕಾದ ನೆರವು ಇಲ್ಲ. ಭಾರಿ ಪ್ರಮಾಣದ ತೆರಿಗೆಗಳು ಮತ್ತು ಆಯ್ದ ಕಾರ್ಪೊರೇಟ್‌ ಗಳ ಏಕಸ್ವಾಮ್ಯ ದೇಶದ ಉದ್ಯಮವನ್ನು ಆವರಿಸಿಕೊಂಡಿವೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
